Тыва Республиканың Баштыңының стипендиязын тыпсырының конкурузунга киржир документилерни Өөредилге яамызы хүлээп эгелээн

 Күрүнениң дээди өөредилге черлеринде база ортумак тускай өөредилге черлеринде хүндүс өөренип турар студентилер стипендия адырынче кордап болур. Сөөлгү өөредилге чылында тулган демдектиг өөредилге болгаш эртем шинчилелдеринге көскү чедиишкиннер – кол негелделер. 

 Эртем-шинчилел ажылдары (курс ажылдары) Тываның социал-экономиктиг айтырыын өөренип, ону шиитпирлээринче угланган болур ужурлуундан, дыка хөй студентилер конкурсту эртпейн баар деп, яамы дыңнаткан. Кордакчыларның хөй кезии өске объектилерни шинчилээн курс ажылдарын дужаап турар.  

 2017 чылдың октябрь 30-ге чедир документилерни хүлээр. Күзелдиг кижилер ол үеге чедир дараазында документилерни яамыже дужаар:  

• стипендия тыпсыр конкурска киржир дугайында бодунуң билдириишкини;  

• өөредилге чериниң бадыткааны, зачет дептеринден сөөлгү өөредилге чылының хоолгазы азы ушта бижилгези;  

• өөредилге чериниң удуртукчузу азы факультет деканындан кордакчының чедиишкинин айыткан бижик; 

• Тыва Республиканың студентилер хөй-ниити каттыжыышкыны – землячестводан таныштырылга; 

• эртем статьяларының шынзыткан хоолгалары база өөредилге адырының (угланыышкынының, мергежилиниң) аайы-биле эртем шинчилелдеринге, студент конференцияларга, олимпиадаларга, чогаадыкчы конкурстарга болгаш фестивальдарга киришкенин бадыткаан документилер; 

• Тыва Республиканың чогуур адырлар аайы-биле яамылар болгаш ведомстволарның түңнелин кошкан, Тыва Республиканың социал-экономиктиг хөгжүлдезинде айтырыгларны шиитпирлээринче угланган курс ажылының азы шинчилел төлевилелиниң хоолгазы. Ажылдарны беш демдектиг система-биле үнелээр. 

Конкурсче киирип турар ажылының темазы өөренип турар угланыышкынынга (мергежилинге) дүгжүп турар ужурлуг.