Июль 14-те Тываның найысылалынга Сибирь-Азийжи стоматология шуулганы болуп эртер

 Июль 14-те, 10 шакта, Улусчу чогаадылга бажыңынга «Сибирь-Азийжи стоматология шуулганы» II бүгү-российжи эртем-практиктиг конференция эртерин ТР-ниң Кадык камгалал яамызы дыңнаткан. Ооң ажылынга Гонконг, Англия база Бельгиядан специалистер киржир.

  Ф.В. Войно-Ясенецкий аттыг Красноярскиниң күрүнениң медицина университединиң Стоматология институдунуң удуртукчузу, Сибирь федералдыг округтуң штаттан дашкаар кол стоматолог специализи Василий Алямовский саналдааны-биле Россияның Стоматология Ассоциациязы (СтАР) конференцияны маңаа организастап эрттирер. Тыва Республикада стоматологияның сайзыралында берге айтырыгларны ол эки билир. «Сибирь-Азийжи стоматология шуулганы» I бүгү-российжи конференция 2015 чылда Улан-Удэ хоорайга эрткен. 

 Даштыкы аалчылардан аңгыда, Москваның, Алтайның, Бурят база Хакас республикалардан стоматологтар кээр. Стоматология поликлиниказының эмчилери болур «Тываның стоматологтары» хөй-ниити организациязының кежигүннери Тываны төлээлээр. Стоматология поликлиниказы бистиң республикада стоматология угланыышкынныг эмчилерге методиктиг болгаш практиктиг дузаны көргүзүп турар Тыва Республикада чаңгыс кол албан чери болур.  

 «Сибирь-Азийжи стоматология шуулганы» конференция ажылында специалистер амгы үеде стоматологияның чидиг айтырыгларын сайгарып, диш аарыгларын болдурбас дээш арга-дуржулгазын солчуру солун. Гонконгдан специалист Тин Чун Вонг ооң дугайында чугаалаар. Бистиң республиканың чурттакчыларының кадыкшылынга дээш, өске чурттарның арга-дуржулгазын болгаш эртем-билиин солчуп, стоматологтуг аарыгларның диагностиказын, эмнээшкинин база профилактика технологияларын экижидер аргаларны, эмнээшкин практиказында оларны дүрген ажыглаарын конференцияның ажылында чугаалажыр. 

 Аңгы-аңгы чурттардан специалистерниң киржилгези-биле эртер бүгү-российжи эртем-практиктиг хемчег келир үеде Тыва Республиканы сибирь-азийжи шөлдерге делегей стоматологиязының сөөлгү чедиишкиннерин көргүзер, башкарыкчы эртемденнерни, эмчилерни, стоматолия албанының удуртукчуларын чалап, российжи стоматологияның айтырыгларын сайгарып, сөөлгү чылдарда чурттуң кадык камгалалында чугула угланыышкыннарының бирээзи - үзүктелиишкин чок эмчи өөредилгезин чедип алырын боттандырар.  

 «Сибирь-Азийжи стоматология шуулганы» конференцияны эрттирген соонда, даштыкы дээш өске-даа коллегалар-биле кады ажылдажылга чогуп, делегей чергелиг төлевилелдерге киржип, специалистерни өөредип, мергежилин бедидеринге чаа аргалар тургузустунарынга Стоматология поликлиниказының кол эмчизи Бежен-оол Торуш идегеп турар.