Москвада тыва чаңгыс чер-чурттуглар ниитилежилгези Тываның Баштыңынга студентилер дугайында сагыш човаашкыны дээш өөрүп четтиргенин илереткен

 Москваның дээди өөредилге черлеринде өөренип турар Тывадан студентилер, республиканың Баштыңы Шолбан Кара-оолга, төрээн черинче чанар билеттерни садып бергени дээш өөрүп четтиргенин илереткен.  

 Тываның Баштыңы республика чазааның мурнундан Москвада тыва студентилерни бодунуң хайгааралында алганын сагындыраал. Чыл санында чаңгыс чер-чурттугларының организастап эрттирип турары чаңчылчаан спортчу маргылдааларында тиилээн команданың 11 кежигүнүнге чанар авиа билеттерниң чарыгдалын куратор төлээн. 

 Олар дээш сагыш човаашкыны дээш республиканың баштыңынга четтиргенин аныяктар илереткен. Чазак Даргазы бодунуң хайгааралында алган кижилеринге дуза чедирери чаагай чаңчыл апарган. 2016 чылда шак-ла ындыг белекти Тываның студент аныяктарының тажы болгаш даңгына мөөрейиниң 16 киржикчизи алган. 

 Тываның Баштыңы ажыл-албан аайы-биле Москвага сургакчылап чорааш, студентилер-биле ужуражыр үени тып, оларны деткип, арга-сүмени берип чоруур кижи деп, студентилер демдеглээннер.