2017 чылда Тываның кадык камгалал шугумунга 300 ажыг аныяк эмчилер немежир

 Тываның кадык камгалал яамызы дээди өөредилге черлериниң доозукчулары, интерннер болгаш ординаторлар болур аныяк эмчилерни хүлээп алырынга белен. 

 300 ажыг дипломнуг специалистер болгаш эмчилерни ажылга хаара тударын Тываның кадык камгалал сайыды Орлан Донгак дыңнаткан. Оларның үштүң ийи кезии бо 2017 чылдың доозукчулары, а артканнары интернатура биле ординатура доосканнар.  

 Диплом соонда белеткел программазынче 2017/2018 өөредилге чылында өскерилгелерни кииргенинден, интернатура эрттирбес апарганын сайыт чугаалаан. «Ынчангаш, доозукчуларның хөй кезии, ылаңгыя терапевтер биле педиатрлар эмнелге албан черлеринге дораан ажылдап эгелээр. Бо чылын Тывада ординатураже тускай сорулгалыг 45 олутту аңгылаан, элээн эмчилер аңаа өөредилгезин уламчылаар» - деп, Орлан Донгак дыңнаткан.

 Амгы үеде республикада 1439 эмчи, 4516 ортумак база 2361 биче эмчи персоналдары ажылдап турар. 239,75 санныг хостуг эмчи олуттар бар, ооң 145,5-и – кожуун эмнелгелеринде, 94,25-и – найысылал Кызылда.

  Педиатр, терапевт, анестезиолог-реаниматолог база акушер-гинеколог эмчилерге хереглел улуг. База ол ышкаш психиатр база невролог эмчилер чедишпес. Ам келир эмчилерниң хөй кезии – 48 доозукчу база 108 интерн болгаш ординаторлар Тывага аңгылаан олуттарга өөренген. 150 хире педиатр болгаш терапевтер тускай мергежилдиг эмчи кадрларның одуруунга немежир.