Тывада уругларның чайгы кадыкшылга кампаниязы эгелээн

 Бөгүн Тывада уругларга дыштанылганың 151 лагери ажылын эгелээн.  

 Июнь 6-да оон өске 13 лагерь уругларны хүлээп алыр. ТР-ниң Аграрлыг лицейинде хүнзээр-хонар лагерь ажылдап турар. Чайгы үеде кадыкшылганың 192 албан черин республикага ажыдары планнаттынган. Оларның 174-ү хүндүскү лагерьлер, а 18-и хоорайдан дашкаар черлерде. 7-ден 17 хар чедир назылыг шупту школачыларның 33 хуузун, азы 17 муң ажыг уругну хаара тудар.  

 Бо чылын Тыва Республиканың Аграрлыг лицейинде база Каа-Хем кожууннуң Сизимде ийи стационарлыг лагерь ажыттынар, аңаа 630 уруг дыштаныр.  

 Эрткен чылга деңнээрге, чайгы дыштанылга кампаниязын эрттиреринче 10 хуу хөй, азы 117 млн. рубльди тускайлаан. Акшаландырыышкынның кол кезиин республика бюджединден үнер, ооң аңгыда муниципалдыг бюджеттиң база бюджеттен дашкаар дөстерниң акша-хөреңгизин ынаар хаара тудар.  

 Хоорайдан дашкаар лагерьлерже путевканың ортумак өртээ 14 муң рубль болза, хүндүскү лагерьлерже – 4 муң ажыг рубль. ТР-ниң Уруглар болгаш өг-бүле херектериниң талазы-биле агентилел амыдыралдың берге байдалынга таварышкан уругларга халас путевкаларны бээр.  

 Уруглар лагерьлери Россияда Экология база Тывада Аныяктарның бот-идепкейиниң чылынга тураскаадып, кижизидилге хемчеглериниң утка-шынарынче онза кичээнгейни углаар. Спортчу-кадыкшылга, шериг-патриотчу, экологтуг, лингвистиктиг дээш, 14 угланыышкын-биле кижизидилге программаларын болгаш профильдиг сменаларны ажыдар. Дыштанылга лагерьлеринге 1193 ажылдакчы база 232 эмчи ажылдаар.

  Бирги сменада ажылдаар 192 хүндүскү лагерьниң 92 хуузу, азы 143-ү бөгүн санитар-эпидемиологтуг түңнел бижикти алган. Росхереглел хайгааралының ТР-де эргелели май төнчүзүнге чедир аъш-чем аймааның 71 хандырыкчыларын хынап, олар-биле керээлерни чарган. Күрүнениң өрт хайгаарал органнары хоорайдан дашкаар дыштанылганың 18 лагерин хынап дооскан. Ол лагерьлерде видеохайгааралдың болгаш өрт медээчизиниң системаларын тургузуп, хайгаарал бүдүрүлгелери-биле керээлерни чарган.  

 Оон аңгыда, 2017 чыл эгезинден бээр республикадан дашкаар: «Океан», «Орленок», «Смена», «Артек» уругларның бүгү-делегей төптеринче база «Тесь», «Бальзам», «Красноярское Загорье» санаторий» уругларның федералдыг санаторийлеринче уругларны дыштандырып, кадыкшылын дадыктырып турар. Чыл төнчүзүнге чедир 1632 уруг дыштаныр.