26.05.2017
Москвага Тываның Баштыңы Шолбан Кара-оол Г.В.Плеханов аттыг Россияның экономиктиг университеди-биле кады ажылдажылга керээзин чарган. Консалтинг, аналитика, эксперт, өөредилге болгaш инновация ажылдарынга, эртем-шинчилел ажыл-чорудулгазынга кады ажылдаарын дугуржулга документизинде айыткан.
Дугуржулганы чарып тура, ону боттандырарының планында атты база салган. Россия Федерациязы биле республиканың социал-экономиктиг хөгжүлдезинге улуг ужур-дузалыг угланыышкыннарда шинчилелдерни кылырын, регионнар база чоннар аразының кады ажылдажылгазын хөгжүдеринге деткимчени бээрин, экономика болгаш удуртуп-башкарар кадрларны белеткеп база эде өөредиринге Тывага дузалажырын ында көрген.
Оон аңгыда өөредилге, эртем-шинчилел программаларын, инновация төлевилелдерин, аныяктарның эгелээшкиннерин кады боттандырар.
Дээди өөредилге чериниң талазындан Г.В. Плеханов аттыг Россияның экономиктиг университединиң ректору Виктор Гришин атты салган.
«Тывага ол онзагай болгаш чугула болуушкун-дур. Бистиң республиканың тускайлаңы – бизнести база бүгү-ле ажыл-агый комплекизин хөгжүдер дээрге, географтыг туружундан ында рыноктуң кызыгаарлыы, транспорт харылзаазының чедишпези шаптараазыннарны тургузуп турар. Ол бергелер ам-даа шиитпирлеттинмээн, ынчангаш экономика адырында нарын айтырыгларны шиитпирлээринге тускайлаң үннүг бедик мергежилдиг специалистер дыка херек. А «Плехановка» ындыг кадрларны белеткеп турар алдар аттыг дээди өөредилге чери-дир» - деп, Шолбан Кара-оол демдеглээн.
Регионнуң Баштыңы ол хемчегниң түңнелин социал четкилерде бодунуң арынында бижээн:
«Чурттуң эң улуг экономиктиг дээди өөредилге чери, алдар-аттыг «Плешка» азы Г.В. Плеханов аттыг Россияның экономиктиг университеди-биле кады ажылдажылга дугайында дугуржулгага атты чаа-ла салдым. Ам өөредилге чери Тывага бюджет олуттарын аңгылап бээр. Бодунуң ужур-чаңчылдары болгаш быжыг билии-биле шылгараан өөредилге чериниң дыка хөй доозукчулары бизнесте, күрүне эргелеп-башкарылгазында, политикада дээш, өске-даа адырларда чайынналчак депшилгелиг ажылдап чоруур. Партияның дээди чөвүлелинде кады болгаш, ректор Виктор Иванович-биле эки таныш мен. Бистиң республикага кээп чораан, бистиң айтырыгларывыс-биле таныш. Кол чүве, бистиң уругларывыска, кадрларны белеткеп турар башкыларга өөрүп четтиргенивисти илередир апаар. Студентилеривис-биле ужураштым. Ам-даа чүткүдүңер, оолдар! Республикавысты хөгжүдеринге боттарывыстың абалкиннер, голиковтар, гуцериевтер чугула херек».