Тываның Баштыңы Моолдуң девискээринге орук озал-ондаанга таварышкан херээжен кижиниң кадыкшыл байдалын хыналдага алырын дааскан

24.05.2017

Май 23-те, Улангом – Боршоо күрүне кызыгаары оруунга Тыва Республикадан 5 кижилиг автомашина орук озал-ондаанга таварышкан.

Автоаварияның уржуундан, ийи херээжен кижи амы-тынындан чарылган, бир кижини Улангом хоорайның эмнелгезинде чыттырган. Өске пассажирлер улуг кемдээшкин чок болганындан, эмнелгеге чыдарындан ойталаан.

Тываның Баштыңы Шолбан Кара-оолдуң даалгазы-биле, Тыва Республиканың Кадык камгалал яамының ажылдакчылары чаңгыс чер-чурттуунга дуза көргүзер дээш, Улангомже үнүпкен. Май 24-те, даң баштадыр, ында чеде берген.

Регионнуң удуртукчузу бодунуң оралакчызы Анатолий Дамба-Хууракка мөчээн кижилерниң мөчүзүн эккээринге дузаны кадарын дааскан.

Баш бурунгаар медээ-биле алырга, автомашина Хандагайты суурнуң чурттакчыларынга хамааржыр.