Тывада Сайгарлыкчы чоруктуң неделязы эгелээн

 Тыва Республиканың Чазааның шиитпирин езугаар май 22 – май 28 хүннеринде республикага сайгарлыкчы чоруктуң неделязын эрттирер.

  Ол хүннерниң организастыг хемчеглер планын езугаар май 23-тен 25-ке чедир сайгарлыкчы ажылды чедиишкинниг чорудуп турар «Тыва стиль» ательениң (удуртукчузу Буяна Уваннай), «Tuvantrip» туризм агентилелиниң (удуртукчузу Семен Эренчин), «Тува-РУ» КХН-ниң (чиңгине директору Алексей Малышев) сайгарлыкчылары-биле студентилерниң болгаш сургуулдарның ужуражылгаларын Тываның күрүне университединге, Кызылдың экономика болгаш эрге-хоойлу, транспорт техникумнарынга хүннүң-не 15-16 шактарда эрттирер.  

 Май 23-те Тыва үндезин культура төвүнүң конференц-залынга 13 шактан 17 шакка чедир «Тыва Республиканың регионалдыг бараан демдээ республиканың көдээ ажыл-агыйын сайзырадырынга болгаш быжыглаарынга салдар чедирип болур бе» деп темага «төгерик столду» ТР-ниң Экономика, Көдээ ажыл-агый болгаш аъш-чем яамыларының болгаш Садыг-үлетпүр палатазының тускай эртемниглериниң киржилгези-биле эрттирер.  

 Май 24-те 10 шактан 13 шакка чедир ТКУ-нуң Өөредилге-лабораторлуг корпузунга «Бизнес-идеяны боттандырары» деп темага өөредилгелиг тренингини ТР-ниң Экономика яамызының, «ТР-ниң Бизнес-инкубатору» бюджеттиг албан чериниң, Тываның күрүне университединиң, ТР-ниң сайгарлыкчы чорук деткиир төвүнүң тускай эртемниглери чорудар.  

 Ол-ла хүн 15 шактан 16 шакка чедир Тываның садыг-үлетпүр палатазынга сайгарлыкчы өг-бүлелер аразынга «Авам, ачам база мен – бизнес өг-бүле бис» деп конкурсту эрттирер.

  Май 25-те 9 шактан 13 шакка чедир биче болгаш ортумак бизнестиң бүдүрүлгелери «Эдем» кондитер фабриказынче болгаш Сукпактың «Заря» эът комбинадынч естудентилерниң экскурсиязын организастаар. 

 Ол-ла хүн Национал паркка 13 шакта «Чедиишкинниң орук айтыкчызы» деп бизнес-квестини организастаар. 

 Май 26-да 14 шактан 16 шактарда Тыва үндезин культура төвүнге Тывада инвестиция климадын экижидер талазы-биле тускай штабтың хуралы болур. Ол хуралга чер участоктарынга эрге байдалдарын бүрүткээринге хамаарыштыр административтиг шаптараазыннарны сайгарар. 

 Май 27-28 хүннеринде Кызылдың Иркутская кудумчузунда болгаш «Сайзырал» көдээ ажыл-агый рыноктарынга сайгарлыкчылар хүнүнге тураскааткан «Бистиин садып алыңар» деп байырлалдың ярмаркаларын, а май 26-дан май 28 хүннеринде Кызылдың Иван Ярыгин аттыг спорт комплекизинге «Тыва экспо-2017 чыл. Час» деп регионнар аразының 17-ги делгелге-ярмарказын организастап эрттирер.  

 Тыва Республиканың Баштыңы Ш.В.Кара-оолдуң деңнелинде инвестиция климадын экижидеринге административтиг шаптараазыннарны болгаш сайгарлыкчы чорук субъектилеринге чер участоктарынга эргени тургузарынга чидиг айтырыгларны шиитпирлээр тускай штаб Сайгарлыкчы чорук неделязын хаар. 

 Тыва Республиканың Экономика яамызы биле Тыва Республиканың Садыг-үлетпүр палатазы Сайгарлыкчы чорук неделязының хемчеглерин организастап эрттирер.