Тывада эжиндириишкин сезонунга белеткел эгелээн

 Чурттакчыларның массалыг эштиринге көрдүнген черлерде суг хөөлбектериниң дүвүнге шинчилел чорударын, арыглап-аштаашкынны кылырын Тываның Баштыңы Шолбан Кара-оол камгалакчыларга дааскан.  

 Бо ажылды июнь 15-ке чедир доозар ужурлуг. Эжиндириишкин сезонунуң бүдүүзүнде республиканың эрге-чагыргаларының боттандырып турар хемчеглериниң чүгле чаңгызы бо. Сугга айыыл чок чорукту хандырарынче, кемдээшкиннерни болдурбазынче болгаш кижилерниң өлүп хораар чоруун чайладырынче угланган хемчеглерниң бүдүн комплекизин Тываның Баштыңының даалгазын езугаар республиканың Чазаа ажылдап кылган. 

 Чай эгелээринге чедир муниципалдыг эрге-чагыргалар массалыг эштир черлерни тодарадыр, оларны доктааттынган чурум езугаар дериир ужурлуг. Улустуң эштир черлеринде сугга санитар-химиктиг, микробиологтуг анализтерни кылырын санитар-эпидемиологтуг контроль албаннарынга дааскан. Чоннуң сугларга массалыг дыштаныр үезинде хайгаарал чорударының планнарын тургузарын, халап болган таварылгада күштерниң болгаш чепсек-херекселдерниң белениниң дугайында отчеттарны киирерин ТР-ниң Чазаа тус чер чагыргаларындан негээн.  

 Эрткен чылын эштип тура, 21 кижи амызындан чарылганын сагындыраал, оларның ийизи бичии уруглар. Ооң мурнунда чылда 23 кижиден когааран бис, оларның 6-зы назы четпээннер. Амы-тынындан чарылган кижилерниң хөй кезии эштиринге тускайлаттынмаан черлерге ийикпе, азы эзирик байдалдыг тургаш, сугга дүшкенин, ОБЯ-ның Тывада кол эргелели дыңнаткан. 

 Суглардан эң айыылдыг чер Енисей хем болур. 2016 чылда аңаа эштип турган 7 кижи дүшкен. Оон аңгыда Таңды болгаш Эрзин кожууннарның хөлдеринге дыштанып чораан 5 кижи чанып келбээн, Тожунуң Хам-Сырага 3 кижи дүжүп өлген.  

Кичээнгейлиг болуңар, чаңгыс чер-чурттугларывыс!