Президентиниң кадет училищезинче оолдарның дужаап кирерин белеткээри-биле Тываның школаларынга кадет класстарын ажыдар

  Тывада Кызылдың Президентиниң кадет училищезинге (КПКУ) өөренир кандидаттар шилилгезин чада аайы-биле чурумчудар. КПКУ-же өөренип кирер күзелдиг өөреникчилерни республиканың 17 кожуунундан шилип, оларның дужаап кирерин белеткээр баштайгы звено – кадет класстарны ажыдар. 

 ТР-ниң Өөредилге болгаш эртем яамызының хуралында ындыг класстарны ажыдар дугайында шиитпирни КПКУ-нуң башкыларының киржилгези-биле хүлээп алган. Тываның Баштыңы Шолбан Кара-оолдуң негелдези езугаар, эвээш орулгалыг болгаш хөй ажы-төлдүг өг-бүлелерден оолдарның дужаап кирерин чедип алыры-биле, ындыг класстарга шыырак билиглер-биле чепсеглээрин чедип алыр деп, өөредилге сайыдының оралакчызы Светлана Ощепкова чугаалаан. 

 «Президент училищезинче ажы-төлүн киириксээр кижилер дыка хөй. Эрткен чылын 239 олутче 800 билдириишкин кирген. Хүлээп алыышкын комиссиязы шыңгыы шилилгени чоруткан. Эң-не тергиин дээн өөредилге черинче амыдыралдың берге байдалынга таварышкан, социал байдалы кошкак өг-бүлелерден оолдарны хүлээп алыр негелде бар, ындыг болзажок дужаап турар оолдарының өөредилгези болгаш кадыкшылы ындыг-ла кончуг эвес. Ынчангаш республиканың Баштыңы КПКУ-че дужаар оолдарның баш бурунгаар тускай белеткелин чорударынче кичээнгейни углаарын негээн» - деп, Светлана Ощепкова тайылбырлаан. 

 Кадет класстар Кызылдың президентиниң кадет училищезиниң хайгааралынга ажылдаар болгаш, өөредилге чорудуун ооң негелделеринге дүүштүр эрттирер. Көдээ черде башкылар өөредилгениң ниити деңнелин бедидери-биле КПКУ-да амгы өөредилге стандартарын үлегер-чижекке көргүзүп ажыглаар.  

 Кожуун төптеринге кадет класстар сентябрь 1-де ажыттынар. Девискээрлерниң онзагайын өөренип көрбүшаан, кадет класстарны угланыышкыннарлыг кылырын дугурушкан. Чижээ, кызыгаар кожууннарда заставаларында шериг албанныгларны өөредилге-кижизидилге ажылынче хаара тудары-биле келир үениң кызыгааржылар класстарын ажыдар. Өске муниципалитеттерге камгалакчылар, өртчүлер, полицейжилер дээш, өске-даа угланыышкынныг класстарны хевирлээр.