Тываның Баштыңы республика прокурорунуң албан-дужаалынга ажылдаар кандидат-биле ужурашкан

 Тываның Баштыңы Шолбан Кара-оол Россияның Чиңгине прокурору Юрий Чайканың регионнуң удуртукчузунче чорутканы кандидат Александр Боровков-биле дүүн ужурашкан. Республика прокурорун амгы хоойлужудулга езугаар Тыва Республиканың Баштыңы база ТР-ниң Дээди Хуралы (парламентизи) чөпшээрээн соонда, РФ-тиң Чиңгине прокурору ону томуйлаар. 

 Регион удуртукчузу ол албан-дужаалче кандидатты чөпшээрээниниң азы ойталаанының дугайында чарлыкты үндүргеш, ону республиканың хоойлужудулга органынче киирер. Парламентиниң аңаа хамаарышкан шиитпири доктаал кылдыр үнер болгаш, ону РФ-тиң Чиңгине прокурорунче база ТР-ниң Баштыңынче чорудар. 

 Апрель 19-та Дээди Хуралдың сессия хуралынга Александр Боровковтуң кандидатуразын көөр. 2012 чылдың ноябрьдан бээр Тыва Республиканың прокуратуразын удуртуп турган Алесандр Гринев, апрель эгезинде, Вологда облазында шак-ла ындыг албан-дужаалче шилчээнин сагындыраал. 

 Александр Николаевич Боровков 1967 чылда Красноярск хоорайга төрүттүнген. 1991 чылда Красноярскиниң күрүне университедин дооскан. Красноярскиниң транспорт прокуратуразынга истекчилеп, улуг истекчилеп, Ортаа-Сибирьниң транспорт прокуратуразының истелге килдизиниң начальнигиниң оралакчызынга, Красноярск крайның прокуратуразының онза нарын херектер истелгезинге база оперативтиг-дилээшкин ажыл-чорудулгазынга, истелге эргелелинге хайгаарал килдизиниң начальнигинге ажылдаан. 

 2007-2008 чылдарда Красноярск крайның прокуратуразының кеземче-процессуалдыг база оперативтиг-дилээшкин ажыл-чорудулгазынга хайгаарал талазы-биле эргелелди начальниктээн. Россияның ИХЯ, Россияның ОБЯ, Россияның ФСПА, Россияның ФККА территориалдыг органнарының кеземче-процессуалдыг ажыл-чорудулгазынга хайгаарал килдизин, иштики херектер болгаш кеземче күүселдезиниң органнарының онза нарын херектерни истээр база оперативтиг-дилээшкин ажыл-чорудулгазын база эрге-хоойлу статистиказын хайгаараар килдисти башкарар айтырыглар талазы-биле Красноярск крайның прокурорунуң оралакчызынга 2008 чылдың январь 25-тен бээр ажылдап турган.