Закрыть
Логин:
Пароль:
Забыли свой пароль?

Войти    

Россияның хостуг хүреш маргылдаазынга Тывадан Алдынай Даржаа 43 кил деңзиге чемпионнаан

Россияның хостуг хүреш маргылдаазынга Тывадан Алдынай Даржаа 43 кил деңзиге чемпионнаан 18.04.2017
 Чурттуң 31 регионундан 140 спортчу Мурнуу-Сахалинге бир-ле дугаар эрткен маргылдаага киришкен.
  Олар алдын медальдар болгаш Россияның чыынды командазының составы-биле делегей маргылдааларынга киржир эрге дээш хүрешкеннер. Сөөлгү хүнде шилилде сегиржип алыышкыннар болган. Москва, Иркутск, Хабаровск, Тверь, Санкт-Петербург, Чуваш республика, Новосибирск, Ульяновск, Красноярск дээш, өске-даа черлерден элээди спортчулар беш аңгы деңзиге солун хүрешти көргүскеннер.
  30 секунда дыштаныр үелиг, 2-2 минута хүреш үезинде мөгелер бодунуң мергежилин – тактиказын, мага-бодунуң күш-шыдалын, шыдамыын болгаш мөзү-бүдүжүн көргүзер ужурлуг. Маргылдааның кол судьязы Александр Чуенко олимпийжи категориялыг, дээди класстың профессионалдары оюннарны шииткенин демдеглээн. 
 Турнирниң ээлери маргылдааның түңнели-биле үш медальды чаалап алган, Анастасия Парохина чемпионнаан, Фарида Азизова биле Полина Купцова хүлер медальдарны чаалап алган. 
 Тываның спортчулары маргылдаада чедиишкинниг хүрешкен. 43 кил чедир деңзиге Алдынай Даржаа чемпионнааш, чурттуң чыынды командазының составынче кирген, а 38 кил чедир мөгелер аразынга Чойган Тумат үшкү черни ээлээн. Социал четкилер таварыштыр республиканың чурттакчылары элээди мөгелерге байырны чедиргеннер. Европаның үш, делегейниң ийи, Россияның каш дакпыр чемпиону, Афинага Олимпий оюннарының киржикчизи Лориса Ооржак спортчуларны белеткээн тренер башкызы ол.

Возврат к списку