Тываның Баштыңы Шолбан Кара-оол ажыл-агый аайы-биле Москвада

 2025 чылга чедир Тыва Республиканың социал-экономиктиг хөгжүлдезинче угланган хемчеглер планынче өскерилгелер киирер дугайында Россия Чазааның айтыышкынының төлевилелиниң талазы-биле хуралга бөгүн Тываның Баштыңы Шолбан Кара-оол киржир. Россия Федерациязының Чазааның Бажыңынга эртер хуралды вице-премьер Дмитрий Козак удуртур.  

 Тыва Республиканың социал-экономиктиг хөгжүлде планын 2015 чылдың апрель 17-де бадылаанын сагындыраал. РФ-тиң Чазааның Даргазы Дмитрий Медведев ол документиге атты салган. Планда улуг инфраструктура төлевилелдери кирген. Оларның аразында - «Кызыл» аэропорт комплекизин эде чаартыры база бар. Бо хүнде аэропорттуң ужудуп-хондурар чаа шөлүнүң 1500 метрин тудуп дооскаш, ажыглалче киирген, ам арткан 1200 метринде ажылдар чоруп турар. Оон аңгыда, инфраструктура, энергетика, коммуникация хөгжүлдезинге болгаш социал төлевилелдерге, хой болгаш өшкү, соңгу чүк ивизи база чылгы мал ажыл-агыйларынга организастыг дуза көргүзер 12 пункт планда кирген. Тываның Баштыңының ажыл графигинде федералдыг яамыларга база ведомстволарга ужуражылгалар планнаттынган.