Тывада "Чылдың башкызы-2017" мөөрейге Тайгана Сандак тиилээн

 Мөөрейлерниң түңнелинде, «Тыва Республиканың чылдың башкызы-2017» атка Кызылдың 8 дугаар школазының физика база информатика башкызы Тайгана Сандак төлептиг болган. Кызыл хоорайда «Золотой ключик» 1 дугаар уруглар садының башкызы Оюмаа Шуңней «Чылдың кижизидикчизи» атты алган. «Чылдың башкызы» мөөрейниң тергиин аныяк специализи атка Тожу кожууннуң Тоора-Хем школазының орус дыл болгаш литература башкызы Чодураа Донгак төлептиг болган. «Төрээн болгаш орус дылдарның бүгү-российжи мастер-клазы-2017» мөөрейге Бай-Тайга кожууннуң Кызыл-Даг школазында орус дыл болгаш литература башкызы Ольга Күжүгет шылгараан.

 «Өөредилге чериниң тулган эр башкызы-2017» мөөрейниң тиилекчилерин база илереткен. Мөңгүн-Тайга кожууннуң Кызыл-Хая ортумак школазының директору Орлан Комбу Тывада эң шыырак эр удуртукчу (директор) болган. «Эр башкы – эки кижизидикчи» номинацияга Ак-Довурактың 4 дугаар школазының директорунуң кижизидилге ажылының талазы-биле оралакчызы Айдыс Салчак тиилээн. «Эр башкы – шыырак эртем башкызы» деп атка Барыын-Хемчик кожууннуң Кызыл-Мажалыктың 2 дугаар школазының география башкызы Орлан Донгак төлептиг болган.

  Тиилекчилерден аңгыда, лауреаттарны база шаңналче киргеннерни онзалап демдеглээн. Мөөрейге киржилге – башкы бүрүзүнге улуг харыысалганы онаап, коллегаларындан эки арга-дуржулганы шиңгээдир арганы бээр. Мөөрейниң хүннери – мастер-класстар, ажык кичээлдер, төлевилелдер, башкылар чыыштары, брифинглер, башкыларның ток-шоулары-дыр.  

 «Төрээн болгаш орус дылдарның бүгү-российжи мастер-клазы-2017» мөөрейниң республика чадазының бир угланыышкыны - «Өөреникчилерниң төрээн болгаш орус дылдарда чогаадыкчы мөөрейи» болган. Аңаа 3-тен 10 класска чедир 19 өөреникчи киришкен. Бай-Тайга кожууннуң Кызыл-Даг школазының 10-гу классчызы Айслу Салчак аңаа тиилээн.