Моол чаартынган «Хандагайты-Боршоо» хыналда-эрттирилге пунктузун улгаттырар планныг

 Ол чурттуң чиңгине консулу дээрги Б. Ганцэцэг, а ол ышкаш саң-хөө яамызының база каайлы албанының төлээлери Хандагайты контроль-эрттирилге пунктузун чаартыр дээн боттарының планнарын Россияныы-биле тулгаштырар сорулга-биле Тывага чорааннар. Чаартылганың төлевилелин Тываның Баштыңының даалгазын езугаар Чазак Даргазының оралакчызы Александр Брокертке болган чөвүлел хуралга сайгарган, аңаа сонуургалдыг албан черлериниң удуртукчулары киришкеннер.  

 Ийи таланың дугуржур чүүлдери хөй дээрзи чугаа үезинде илерээн. Автомобиль эртер черде дилиндектерниң безин ылгалдыы билдинген. Тыва болгаш Роскызыгаар-тудуг шимчээшкинни бир талазынче үш дилиндекти: чиик машиналарга, автобустарга болгаш чүък машиналарынга аңгы оруктарны планнаан. Моол специалистерниң санааны-биле алырга, аргыштырылга чоорту идепкейжип келир, ынчан үш дилиндектиг терминал чедишпес апаар дээш, олар беш дилиндектиг шимчээшкинни төлевилеп турар.  

 Контроль-эрттирилге пунктузун чаартып кылыр ажылды кичээнгейлиг көөр, каайлы инфраструктуразында өскерилгелерни барымдаалаар херек дээрзин ужуражылганың киржикчилери демдеглээннер. Объектини төлевилеп турар организацияларның немелде ужуражылгазы херек апарган. Олар эрттирилге пунктузун беш дилиндек чедир калбартырының айтырыын сайгарар болгаш эрге-чагыргаларга болгаш чагыкчыларга саналдарын киирер. 

 Моол таланың киирген саналын Роскызыгаар-тудуг хүлээп алыр-даа болза, акшаландырыышкынның хемчээли 2017 чылда үш дилиндекке көрдүнген түңүнден ашпас дээрзин Александр Брокерт демдеглээн. Бир-тээ терминал модульдуг кылдыр туттунар апарза, ооң эрттирилге күчүзүн чоорту улгаттырып болур арга туруп кээр.