Тываның Баштыңы кадрларны томуйлаан

 "Шолбан Ховалыгович кадык камгалалының сайыдынга база ажылдаанын билир силер. Ооң соонда Перинатадыг төптүң тудуу-биле холбашкан берге ажылче шилчиткен мен. Ажыл-агыйы ие-чаш камгалалы, чаштарның өлүп хораан чоруун кызырары-биле дорт харылзаалыг. Чазак даргазының социал адырны харыылаар оралакчызындан ажылынга күүсекчи бедик корум-чурумну хандырар, тура-соруктуг шиитпирлерни манап тур мен. Чазактың ажылының чугула угланыышкынының ажыл-чорудулгазы онза хайгааралга турар ужурлуг» - деп, Тываның Баштыңы чугаалаан.  

 Шолбан Хопуя 51 харлыг. Красноярскиниң күрүнениң медицина институдун дооскан. 2009-2011 чылдарда регион чазаанда кадык камгалалының сайыды бооп ажылдаан. ТР-ниң перинаталдыг төвүн алды чыл дургузунда удурткан. Ол үелерде төптүң тудуун дооскаш, ажыглалче киирген. Албан чери эмчи дузазын чедирериниң талазы-биле үшкү бедик технологиялыг деңнелче кирген. 2015 чылда Кызыл хоорайның Төлээлекчилер хуралының депутадынга соңгуткан. «Тыва Республиканың кадык камгалалының алдарлыг ажылдакчызы», «РФ-тиң кадык камгалалының тергиини» хүндүлүг аттарлыг.  

Аппарат хуралынга база бир кадр томуйлаашкынын дыңнаткан. Тываның Баштыңының чарлыы-биле Болат-оол Ондарны республиканың чер болгаш өнчү хамаарылгаларының удуртукчузунга томуйлаан. Тыва Республиканың Соңгулда комиссиязын 2007 чылдан 2016 чылга чедир даргалаан. Болат-оол Ондар 1963 чылда төрүттүнген, Свердловскиниң юридиктиг институдун дооскан. Прокуратура органнарынга, 2004-2007 чылдарда ТР-ниң садыг болгаш сайгарлыкчы чорукту деткиир сайыттың оралакчызынга ажылдаан. «Тыва Республиканың алдарлыг юризи» аттыг. 

 2014 чылдан тура чер болгаш өнчү хамаарылгаларының сайыдының хүлээлгезин күүседип турган Эрес Чульдум халашкан.