Тываның бюджет албан черлериниң удуртукчуларының шалыңын ажылдакчыларының шалыңынче «чоокшулаштырган»

 2017 чылда бюджет албан черлериниң удуртукчулары биле бөдүүн ажылдакчыларның шалыңнарының аразында ылгалы улам кызырлыр. 

 Тываның Баштыңы Шолбан Кара-оол күш-ажыл төлевириниң 2008 чылда бюджет адырынга киирген чаа системазында четпес чүүлдерни эде көрүп турар доктаалга ат салган. Ол доктаал езугаар удуртукчунуң, ооң оралакчыларының болгаш кол бухгалтерниң шалыңнары организацияда ажылдакчыларның ортумак шалыңындан 3 катаптан хөй эвес болур ужурлуг. Нормативтиг актыларны чедир ажылдап кылбаанындан даргалар боттарының шалыңнарын доктаадып каан кызыгаарлаашкыннардан бедик кылдыр тургузуп ап турган. 

 Тываның күш-ажыл болгаш социал политика сайыды Людмила Тас-оолдуң тайылбырлап турары-биле алырга, албан черинге ортумак ажыл төлевирин дээди удуртулга звенозунуң — удуртукчунуң, ооң оралакчыларының болгаш кол бухгалтерниң ажыл төлевирин барымдаалавайн санаар херек. Азы удуртулганың орулгалары доктаттынган хемчээлден херек кырында хөй болуп турар. Ооң түңнелинде анаа ажылдакчылар биле удуртукчунуң шалыңының ылгалы 5-8 катап аңгы.  

 Ынчаар кылыр болза, организацияның ажылдакчылары амыдырап чурттаарының эң биче хемчээлинден куду—7-8 муң рубль алыр, а өскелери — 100 болгаш оон-даа хөй муң рубль шалыңныг болур чорукту чайладыр.  

 Оон аңгыда, 2017 чылдың январь 1-ден РФ-тиң Күш-ажыл кодекизинде регионнарның эрге-чагыргаларының тургусканы топ-менеджерлерниң болгаш бөдүүн ажылдакчыларның ажыл төлевириниң аразында деңзигүүрнү сагыыры дээш бюджет албан черлериниң удуртукчуларының харыысалгазын киирген. Боттарынга үш дакпыр деңнелден шалың алган удуртукчулар-биле керээни үзер арга яамыларда бар апаар. ТР-ниң Күш-ажыл яамызы ооң-биле холбаштыр удуртукчунуң, оралакчызының болгаш бухгалтериниң база анаа ажылдакчыларының шалың төлевиринде кызырылда ылгалын хайгаараар.  

 Республиканың Күш-ажыл аямызының саналдаан эдилгелерин Шолбан Кара-оол деткээн.

 «Өске регионнарда начальниктиң база анаа ажылдакчының шалыңнарында ылгал 8 катап барын билир мен. Тыва бюджеттен ындыг чарыгдалдарны кылыр хире бай эвес регион. Ынчангаш бюджет ажылдакчыларының орулгаларында чөптүг эвес чорукту таарыштырарын үе негеп келген. Бирээде, социал шынчы чоруктуң айтырыы-дыр. Удуртукчу бирги ээлчегде ажылдакчыларының чаагай чоруун бодаар ужурлуг. Ийиде, ол ооң шыдаар менеджер болуп турарының айтырыы болур. Хөйнү алыксаар болзуңза – ажык чок чарыгдалдарың кызырып, кадрларны шын тургузарын боданып, амгы технологияларны шиңгээдип, статотчет дээш эвес, а тодаргай түңнел дээш ажылдаар апаар» - деп, Тываның Баштыңы санап турар.