Төөгү башкызы Николай Качурин күрүне шаңналының дугайында: Оон-даа эки ажылдаарынга чаа идиг-дир

 Тываның Баштыңы Шолбан Кара-оол Ада-чурт камгалакчызының база Шагаа байырлалының бүдүүзүнде республиканың чурттакчыларнга күрүне шаңналдарын тывыскан. Февраль 21-де Чазак бажыңынга байырлыг езулал эрткен. Ол хүн шаңналдарга төлептиг болганнар боттарының бодалдары-биле үлешкен. 

 Николай Качурин, Каа-Хем кожууннуң Сизим ортумак школазының төөгү болгаш ниитилел билиглериниң башкызы, Тыва Республиканың Баштыңының Хүндүлел бижииниң эдилекчизи:  

 - Шаңналды манавааным шуут шын. Мээң ажыл-чорудулгамга, чедиишкиннеримге ындыг улуг үнелелди бергени өөрүнчүг-дүр. Республиканың хөгжүлде херээнге бодумнуң үлүүмнү киириштиреримге, ам-даа эки чүүлдерни кылып, бүгү күжүмнү салырымга чаа идигни берди. Чаңгыс чер-чуртугларымга кел чыдар Шагаа-биле кадыкшылды, аас-кежикти, чедиишкиннерни база алызында күзелдери боттанырын күзедим.  

 - Уруг азыраар узун шөлээде-даа болзумза, ажылдавышаан бис. Уругларым эң бичиизи бөгүн 7 айлаан. Ажылывыс уунда чоруп турар. Хеп быжар болгаш даарар курстар - чаа угланыышкынче кирдивис. Чаа төрүттүнген чашка тыва аянныг дүү, соңга пөстери, орун-дөжек херекселдерин даарап тур бис. Ам улгаттырарывыс ол. Шагаа-биле ак орукту, чогаадыкчы чедиишкиннерни, бүгү-ле чүүлдерге эң-не экини күзедим!

  Эрес Ховалыг, Тывада РИК ИЭ Кызыл хоорай талазы-биле истелге килдизиниң удуртукчузунуң бирги оралакчызы: Тыва Республиканың Баштыңының Хүндүлел бижииниң эдилекчизи:  

 - Мээң ажылымга мындыг үнелелди бергени дээш, бир дугаарында удуртулгамга, ада-иемге өөрүп четтиргенимни илередийн. Амгы үеде кады ажылдап турарым истекчилерниң күш-ажылын демдеглейн. Шыны-биле чугаалаар болза, оларның чедиишкиннериниң ачызында, Тыва Республиканың Баштыңының Хүндүлел бижиин бөгүн алдым. Эр хиндиктиг чонувуска бүгүдеге экини күзедим! Февраль 23-биле!  

 Вера Анай-оол, ТР-ниң албан медицина камгаладылгазының территориалдыг фондузунуң директору, «Тыва Республиканың кадык камгалалының алдарлыг ажылдакчызы» хүндүлүг аттың эдилекчизи:  

 - Хүндүлүг Шолбан Валерьевич! Хүндүлүг Каң-оол Тимурович, коллегалар база чалаткан аалчылар! Мээң бөдүүн күш-ажылымны бедии-биле үнелээни дээш, сагыш-сеткилим доюлуп, өөрүп тур мен. Мында аңгы-аңгы чылдарда ажылдап чораан база ам-даа ажылдап чоруур мээң эргим коллегаларымның үлүг-хуузу улуг деп санаар мен. Бөгүн бистиң республикада медицина көңгүс чаа деңнелде көдүрлүп келген деп бүзүрелдиг чугаалап болур мен. Тываның Чазааның, эрге-чагырганың шупту адырларының, хөй-ниити институттарының, мээң профессионал коллегаларымның ачы-хавыяазы-дыр. Ам-даа деткижип база кады ажылдап тургаш, медицина ажылдакчыларының социал магадылалын болгаш төлептиг туружун быжыглаан кадык камгалал системазын тургузуп алырывыска бүзүрээр мен. Чырыткылыг байырлал Шагаа-биле сеткилим ханызындан шуптуңарга байырны чедирдим! База ол ышкаш Ада-чурт камгалакчызының хүнү-биле!

 Любовь Юсупова, Кызылдың 1 дугаар школазының хоочуну, «Тыва Республиканың өөредилгезиниң алдарлыг ажылдакчызы» хүндүлүг аттың эдилекчизи: 

 - Меңээ бөгүн көргүскен алдар болгаш бедик шаңнал дээш, Тываның Чазаанга, Өөредилге яамызынга, Департаментиге база бодумнуң ынак школамга өөрүп четтиргенимни илередийн. Шагаа-биле! Курай-курай! Бүгү-ле ажыл-херектерге ак орукту күзедим!  

 Мария Кужугет Тываның күрүне университединиң литературлуг музейиниң сектор эргелекчизи, «Тыва Республиканың культуразының алдарлыг ажылдакчызы» хүндүлүг аттың эдилекчизи: 

 - Хүндүлүг Шолбан Валерьевич! Хүндүлүг Каң-оол Тимурович база чалатканнар! Бир дугаарында, бүгү-делегейде төрээн дылдың хүнү-биле шуптуңарга байыр чедирип көрейн. Бөгүн бо хүннү бүгү делегей, аңгы-ңгы дылдарга чугаалажып чоруур шупту кижилер байырлап турар. Ынчангаш Сөс-биле ажылдап турар кижиге - онзагай болуушкуннуг хүн. Ындыг кижи мен болганым база солун. Мээң ажылым бодумнуң чонумнуң дылын өөредиринге, чогаалчылар-биле кады ажылдажылгага тураскааттынган. Күш-ажылымга кичээнгей дээш Тываның Чазаанга база чонумга өөрүп четтирдим. Улуу-биле четтирдим!