Тывада "Биржа шөлчүгежи" электроннуг курлавырны ажылдаткан

 Ол системада бүдүрүп база хандырып турары продукциязын документ езугаар бадыткаткан аъш-чем барааннарының бүдүрүкчүлери бүрүткеткен.  

 Продукцияның өртээнче чедирилгениң төлевирин база киир санаар. Чагып алыкчы чагыгны киирерге, хандырыкчылар боттарының өртээн сүмелээр, оон таарымчалыг саналды шилип алыр. Татарстан Республика ук курлавырны ажылдап кылган. «Күрүне чагыы-2016» бүгү-российжи шуулган үезинде чаа система регионнарның сонуургалын болдурган. «Татарстан Республиканың күрүне чагыы, инвестиция ажыл-чорудулгазы болгаш регионнар аразының харылзаазының талазы-биле агентилел» КУБ-туң чиңгине директору Яков Геллер кады ажылдажылганы дугуржур дээш Тывада келген. Татарстанның агентилели Тыва Республиканың Садып алыышкын адырында керээ системазын таарыштырарының яамызы-биле дугуржулгага атты салыр. 

 "Элээн каш регионнар-биле ажылдап турар бис, бо төлевилелде силерниң республикаңар элээн бурунгаарлай берген-дир, ажылдаарынга белен. Сахалинге, Владимир, Тула областарга четтивис. Келир неделяда Крымче аъттаныптар бис. Шупту бо үе-чадада чедип келген-даа болза, чүгле Тыва Республика ону херек кырында боттандырарынга белен-дир. Мартта төлевилел боттанып эгелээринге бүзүрээр бис» - деп, Яков Геллер дыңнаткан.

 «Биржа шөлчүгежи» садып алыышкын адырында колдуунда-ла 100 (400) муң рубль түңге керээ хамаарылгаларын таарыштырар. 2016 чылдың майдан бээр Татарстанның күрүне болгаш муниципалдыг албан черлери 100-400 муң рубль чедир түңге аъш-чем аймаан «Биржа шөлчүгежиниң» дузазы-биле садып ап турарлар. Чүгле дөрт ай дургузунда регион 8 муң ажыг садыглаашкындан 250 млн. рубль түңге аъш-чем продуктуларын саткан. Оон 37 млн. рубльди (15 хуу) камнап алганын, Татар-инфо дыңнаткан. 

 Шөлчүгеште бүрүткеткен хандырыкчыларның хөй кезии – тус черниң бүдүрүкчүлери. «Биржа шөлчүгежи" бизнести күрүне садып алыышкыны таварыштыр деткиирин хандырар. Ооң мурнунда чагыкчы бүрүзү кымдан кандыг бараанны садып алырын чиге билир, «турум эштер» турган. Ам бис биче болгаш ортумак бизнеске дузалажыр политиканы, азы чижилгелиг ажыл-чорудулгага курлавырны тургусканывыс ол. Ооң эки чүүлү - хандырыкчыларже дорт харылзаалыы. Олар-биле керээни чарарын кым-даа аазап турбас, ындыг болзажок садыглаашкынга киржир арганы берип турар бис. Бо шагда кым-даа балыкты эвес, а сыырткыышты тутсуп бээр. Сырткыыш ол-дур. Төлевилелди херек кырында боттандырар дээш дугуржулгага атты салыры-биле силерниң республикаңарда келгенивис бо. Республика бо төлевилелге сонуургалдыын, ону хүлээп алганынга, дыка таарзындывыс. Тываның Экономика, Чер болгаш өнчү-хөреңги яамылары база кедизинде билиишкинниг-дир» - деп, Яков Геллер чугаалаан. 

 Амгы үеде күрүне садып алыышкынының дугайында № 44 федералдыг хоойлу, өөредилге адырында 100 муң рубль база культура адырында 400 муң рубль чедир түңге садып алыышкыннарны өйлеп турарын, Тыва Республиканың Садып алыышкын адырында керээ системазын таарыштырар яамы тайылбырлаан. 

 Ам чагыкчы биле хандырыкчының аразынга керээ чарарының чаа аргазын киирген. Чагыкчы шынчы эвес хандырыкчылардан камгалалдыг болгаш элээн шынарлыг бараанны боду шилип алыр апаары таарымчалыг. 

Тываның Баштыңы күрүне болгаш муниципалдыг чагыглар кылырда тус черниң бараан бүдүрүкчүлеринче кичээнгейни салганын сагындыраал.  

 "Тус черниң бараан бүдүрүкчүзүн деткиир херек. Кандыг сорулга-биле? Силерниң республика баштыңында элээн каш, ынчалза-даа ийи сорулга бары билдингир. Бирээде, үндүрүглер болгаш өртекке немелделерни девискээрге арттырары, ийиде маңаа ийиги шалың төлевилелин арттырары. Саң-хөөнүң ийиги эргилдези-дир. Силерниң бүдүрүкчүлериңер шалыңын алгаш, силерде баш таарар, хеп аштадыр черлерже, кинотеатрже баар. Ынчангаш кожа девискээрлерже бүзүрелдиг үне бээр, чижип шыдаар бүдүрүкчүнү өстүрер херек» - деп, Яков Геллер тайылбырлаан. 

 Татарстанда электроннуг садыглаашкынның элээн каш курлавырлары бар. Республика ындыг системаны ажыглап эгелээннерниң баштайгызы кылдыр санаттынар. Тыва Республикадан 49 бүдүрүлге болгаш сайгарлыкчылар бир курлавырда бүрүткеттингени билдинген. Олар өске регионнарда чагыглар дугайында медээлерни билип ап, керээлерни чарып турар. Солун саналдар хөй, бир эвес сонуургаар болза, Агентилел кады ажылдаарга беленин, Яков Геллер дыңнаткан.