Тывада интернационалчы дайынчыларны сактып, мөгейген

 Афганистандан дайынчыларны үндүргениниң ээлчеглиг чылынга тураскаткан хемчеглер бөгүн бүгү Тывага эрткен.
 Тываның найысылалы Кызылда Тиилелге Мемориалында «Тываның оолдарынга: локалдыг дайыннарда база дайынчы чөрүлдээлерде дириг арткан болгаш чок болганнарга» деп бижээн БТР тураскаалдың чанынга афган дайынының хоочуннары, чазак болгаш парламентиниң, хоорай чагыргазының, хөй-ниити организацияларының төлээлери, кол федералдыг инспектор, школачылар болгаш студентилер чыглып келген.

 Сөс алганнар дайынчы хөделиишкиннерниң киржикчилеринге оларның эрес-дидим чоруу дээш өөрүп четтиргенин илередип, мөчээннерге бир минутаның сактыышкынын чарлаан. Митинг төнчүзүнде тураскаалга боодал чечектерни болгаш гвоздикаларны салган. 

 Тываның Баштыңы Шолбан Кара-оол интернационалчы дайынчыларның шуптузунга чурттаар болгаш ажылдаарын дужааган.  

«Кижи бүрүзүн сактыр бис, каражавыс эгиттинмес. Дайындан оолдарын манап алган азы чидирген ада-иелерниң шыдамыынга, ынак адаларын азы ашактарын чидирген ажы-төлдүң болгаш кадайларның туруштуунга мөгейдивис. Ажыы-биле чурттаар апаар! Ол оолдар дээш база боду дээш! Тайбың чуртталгада шыпшыңга болгаш шын эвес чүүлге чаңчыгары силерге амыр эвес болган. Ынчалза-даа шупту бергедээшкиннерни эрткен силер, бистиң акы-дуңмалышкы демивис улам быжыг апарган! Силерниң бир демиңер болгаш тура-сорууңарга четтирдим! Чурттаар болгаш ажылдаар-ла деп, дужаадым!» – деп, Тываның Баштыңы Шолбан Кара-оол кыйгырган. 

 Тывадан афган дайынынга 462 солдат киришкен. Дайынчы хөделиишкиннер хоочуннарының саналы-биле, Интернационалчы дайынчылар аттыг Кызылдың 12 дугаар школазының херим иштинде, «Шериг болгаш албан хүлээлгезин күүседип тура мөчээн Тываның оолдарынга» тураскаалды тургускан: иезиниң чылыг-чымчак холдарындан оолдары куштар болуп төрээн черинден ужуп бар чоруурлар. Тураскаал афган дайынга мөчээн 12 оолдарга мөгейигни илереткен: 

 1. Бадарчы Маадыр.