Тываның Баштыңы: Афганистандан шериглерни үндүрген хүн – чанып келгенинге өөрүшкүнүң база чидириг дээш кударалдың хүнү

 Сес чыл үргүлчүлээн афган дайынынга 600 муң ажыг оолдар киришкен, 15 муң шериг чок болган. Тывадан Афганистанга 414 кижи дайылдашкан, оларның 12-зи демир хааржакка чанып келген. Чылдың-на бо хүнде чок болганнарга мөгейип, а дириг артканнар афган чылдарын сактыры чаңчылчаан.

 «Бөгүн Афганистандан совет шериглерни үндүргениниң 28 чылын демдеглеп турар. Сагыш-сеткил саймааралдыг. Ээп чанып келгени дээш өөрүп, чидиригден кударанчыг база-дыр – деп, Тываның Баштыңы Шолбан Кара-оол бодунуң блогунда бижээн. – Бодунуң-на чурту ол дайынны эрткен кижилерден ыяткан ышкаш, ону чугаалаарын хоруп каан турганы хомуданчыг. Сактырга-ла совет солдат бир-ле багай чүве кылганзыг. ХХI чүс чылда Россияда база бүгү делегейде терроризм ышкаш, Ада-чурттуң айыыл чок чоруунга айыылды Афган база тургузуп турганын бо хүнде шупту билир. Чүү чүвеге чедирип болур турганын ам догааштырары белен. Тураскаалдыг ол хүнде афганчы шупту акы-дуңмаларымга байырны чедирип, хүлээлгевисти ак-сеткилдиг күүсеткен бис чугаалап болур мен. Кол командылакчы дужаар болза, ам-даа силгип болур бис. Быжыг кадыкшылды күзедим, эрлер! Кады бис, ам-даа кады чоруур бис!»