Тывага 23 хар чедир аныяктар аразынга дзюдога Сибирь федералдыг округтуң маргылдаазы чедиишкинниг эрткен
13.02.2017
Кызыл хоорайга ээлчеглиг спортчу байырлал болуп эртен. Эрткен дыштаныр хүннерде Иван Ярыгин аттыг спорт комплекизинге 23 хар чедир аныяктар аразынга дзюдо талазы-биле Сибирь федералдыг округтуң маргылдаазы болуп эрткен.
Сибирь федералдыг округтуң Дзюдо федерациязының президентизи Виктор Поддубный республикага келгеш, ук маргылдаа спорттуң бо хевири - дзюдонуң шапкын хөгжүлдезиниң херечизи-дир деп демдеглээн.
«Мөгелер чурту – Тывада дзюдога СФО-нуң чемпионадын эрттирип турары – Бурган авыралы-дыр. Ооң кадында, сөөлгү чылдарда тыва мөгелер чүгле эки эвес, а тергиин эки хүрежип турарлар. Ынчангаш республикада чоргаарланыр чүүлдер бар. Бо залда ажылчын байдал тургустунган-дыр, ол ындыг болур ужурлуг» – деп, маргылдааның ажыдыышкынында Виктор Поддубный демдеглээн.
Тываның Баштыңы Шолбан Кара-оол Дзюдо федерациязының президентизи Виктор Поддубныйның чылыг сөстери дээш, өөрүп четтиргенин илереткен.
«Бис шупту сибирьжилер болганывыска, дыка өөрүп тур мен. Онзагай географтыг черде – Азияның төвүнде келген силер, оолдар. Бо онзагай ылгавыр демдекти ам-даа сайзырадыр бодалдыг бис, ынчангаш Силер-биле улуг маргылдааларда, амыдырал-чуртталгада ам-даа ужуражы бээривиске идегээр мен. Дюдога чоргаарланыр бис, Россияның Президентизи Владимир Владимирович Путин спорттуң бо хевири-биле чоок. Бистиң күрүневистиң баштыңы спортчу кижи болганынга чоргааланыр мен. Деңнежир кижи бар ышкажыл. А Тывага хамаарыштыр чугаалаар болза, бо залда эрткен чылын Европага чемпионнаан Дженни Чамыян бар, база-ла ол ышкаш Европа чемпиону Саян Ондарны чоргаарал-биле адап болур бис. Ынчап кээрге, бистиң база сылдыстарывыс бар. Виктор Анатольевич шын чугаалады, ам-даа бурунгаарлаар ужурлуг силер деп. Дзюдо – чараш оюн, дзюдо – чуртталга-дыр».
Маргылдааның видеоларындан көөрге, хевис кырынга оолдар-даа, кыстар-даа изиг-изиг тудушкан. А аарыкчыларның саны хөй болган.
Возврат к списку
|