Тываның көдээ кооперациязынга 2016 чылда күрүне деткимчезиниң хемчээли 45,2 млн. рубль болган

 2016 чылда Тывада көдээ ажыл-агый кооперациязының хөгжүлдезинче ниитизи-биле 45 млн. 279 муң рубльди угландырган. ТР-ниң Көдээ ажыл-агый яамызы көдээ хереглекчилер кооперативтеринге күрүне деткимчезиниң тускай сорулгалыг программазының күүселдезиниң түңнелдерин үндүрген. Ол программа-биле конкурс шилилдезин эрткен тос кооперативке база бир хереглекчилер ниитилелинге саң-хөө дузазын көргүзер. 

 Бойдус байлаан болбаазырадыр «Сизимский» (Каа-Хем кожуун), эът болгаш балыктан колдуунда белен кылдыр чемнер кылыр «Мөңгүн» (Мөңгүн-Тайга кожуун), картофель ажыл-агыйлыг «Земля надежды» (Таңды кожуун), көдээ ажыл-агый продукциялыг «Ыржым-Булуң», балык болбаазырадыр «Ногаан», көдээ ажыл-агый рыногу тудар «Олеся», национал аъш-чем бүдүрер «Оргаадай» (шупту Улуг-Хем кожуун), сүт болбаазырадыр «Аржаан» (Бии-Хем кожуун) база «Саян-Даа» (Кызыл кожуун) болгаш бойдус байлаа болбаазырадыр «Заготовитель» хереглекчилер ниитилели (Кызыл) 750 муңдан 8,5 млн. рубль хемчээлдиг грантыларны алыр.  

 Программаның киржикчизи болур дизе, бодунуң төлевилелиниң 40 хуузун акшаландырар кылдыр чер ажылдыгларга удур акшаландырыышкын негелдези-биле деткимчени көргүскен. Ынчалдыр кооператорларның инвестиция үлүү 30 млн. 186 муң рубль болган, а он инвестиция төлевилелиниң ниити өртээ – 75 млн. 464,9 муң рубльге дең. 

 Ол акша-хөреңги-биле бүдүрүлге объектилеринге 150 санныг дериг-херекселдерни болгаш техниканы, белен продукция дажыглаар 6 тускай транспортту садары планнаттынганын, ТР-ниң Көдээ ажыл-агый яамызы дыңнаткан. База ол ышкаш, 14 млн. ажыг рубльди бүдүрүлге объектилерин (рыноктар, фермалар, цехтер) тудуп база эде чаартырынга киириштирер. 

 Агар санынче грант акшазы кирип кээрге, ажыл-агыйлар конкурс дугуржулгазының негелдези-биле 18 ай дургузунда төлевилелин боттандырар ужурлуг.  

 Тыва Республикада көдээ ажыл-агый кооперациязын хөгжүдер регион программазындан грант алыкчыларының даңзызы

 "Сизимский" КБК - Тайга кады хүлээп, аштап база болбаазырадыр дериг-херексел садары - 3000000

 "Мөңгүн" КБК - Бүдүрүлге оран-свазын эде чаартыры, эъттен кылыглар бүдүрер база балык ыштаар цехтерге дериг-херекселдер садып алыры - 6000000 

 "Заготовитель" ХН - Бойдус байлааның продукциязын садып ап, ону болбаазырадырын организастаары - 1800000 

 "Земля надежды" КБК- Картофель тарыыр көдээ ажыл-агый техниказының комплектизин садып, ногаа шыгжаар черни тудары - 8566200

  "Оргаадай" КБК - Арбай болгаш кызыл-тастан «тыва далган» бүдүрер дериг-херекселди база тускай транспортту, көдээ ажыл-агый техниказын садып алыры - 6000000 

 "Аржаан" КБК - Сүт-бараан фермазын тургузары-биле амгы сүт цегин улгаттырып база модернизастаары, көдээ ажыл-агый техниказын садып алыры - 6720445

  "Ыржым-Булуң" КБК - Көдээ ажыл-агый продукциязын дажыглаар тускай транспортту садып алыры - 750000 

 "Ногаан" КБК - Балык продукциязын болбаазырадыр дериг-херексел садып алыры - 2543000

 "Олеся" КБК - Шагаан-Арыг хоорайга көдээ ажыл-агый рыногун тудары - 3153402,88 

 "Саян-Даа" КБК - Сүт-бараан фермазын тургузары-биле амгы сүт цегин улгаттырып база модернизастаары, көдээ ажыл-агый техниказын садып алыры - 6745952,12