Тыва бодунуң даг инженерлерин белеткеп эгелээн

 Эрткен неделяда Тываның күрүне университединиң инженер-техниктиг факультединиң даг херээ кафедразын 10 доозукчу доозуп, «Ажык даг ажылдары» мергежил талазы-биле дээди эртемниң дипломнарын алган. 

 Ооң дугайында студентилерниң диплом ажылын хүлээп алыр күрүне шылгалдаларының комиссия даргазы, Тываның одалга болгаш энергетика сайыды Роман Кажин-оол чазак даргазынга илеткээн. 10 доозукчу диплом ажылдарын чедиишкинниг камгалаан, амгы үеде тывыш адырының бүдүрүлгелеринче хуваалданы манап турар. 

 Баштайгы дагжылардан 5 оол база 5 кыс инженерниң дипломун алганын даг херээниң кафедра эргелекчизи Остап Чооду gov.tuva.ru-га дыңнаткан. Олар шупту 5,5 чыл дургузунда бүдүн өөредилге курузун эрткен, ам даг-тывыш бүдүрүлгелеринге маркшейдерлер, мастерлер, карьерлер начальниктери бооп ажылдап болурлар. Университет-биле кады ажылдаар керээлерлиг Тываның башкарыкчы даг компанияларынга бүдүрүлге практиказын чаңгыс эвес удаа эрттирген болгаш, ажыл берикчилеринден эки үнелелдерге төлептиг оларның 10 доозукчузу республика иштинге ажылды тып алырынга кафедраның башкылары бүзүрелдиг. 

 ТывКУ-нуң даг херээниң инженерлерин белеткээр талазы-биле кады ажылдаар эштежилгелерниң аразында – Кызыл-Таштыгның полиметалл чыдынының болбаазырадыкчызы «Лунсин» КХН, «ТарданГолд» алдын тывыш фабриказы, Тываның даг-руда компаниязы (хөмүр-даш), «Ойна» артель дээш, өске-даа черлер бар. Даг херээниң талазы-биле кафедрага бүдүрүкчүлерниң төлевилел ажылдарын, эртем шинчилелдерин база санаашкыннарын кылыр, специалистерни эде белеткээр база өске-даа ачы-дуза чедирер структураны тургусчур дээни, университет-биле кады ажылдажылгага оларның сонуургалдыын бадыткап турар. 

 «Тывыш бүдүрүлгелеринге ажыл тывылбайн-даа баар болза, өөренип алган мергежили-биле бистиң доозукчуларывыс тудугга, орук, даг-камгалал, чазылдырыышкын ажылдарынга-даа дыка херек» - деп, доозукчуларның дагдыныкчызы тайылбырлаан. Тывада даг бүдүрүлгелери ажылдап эгелээн соонда, аныяктар ортузунда дагжының мергежилинге сонуургал улгаткан. Кафедра келир чылын даг инженери дипломнуг 24 кижини доостурар. 

 Тываның Чазаа аныяктар ортузунда инженер мергежилге улуг хереглелди доктаамал чугаалап турар. Тываның Баштыңы Шолбан Кара-оолдуң саналы-биле, 2013 чылда, университетке даг херээниң кафедразы ажыттынган, чоорту инженер-техниктиг факультеттиң тускайлаң кезээ апарган. Оон аңгыда Ак-Довурактың профтехучилищезин дагжылар белеткээр кылдыр эде угландырган. 

 Республиканың эрге-чагыргазы доозукчуларны ажыл-биле хандырар дээш, тывыш адырында бүдүрүлгелерниң хөй кезии-биле дугуржулгаларны чарган. Компаниялар ооң негелдези езугаар тус черниң специалистеринге болгаш ажылчыннарынга ажылдаар олуттарның 50-ден эвээш эвес хуузун бээр ужурлуг. Даг үлетпүрүнге кадрларны белеткээр система ажылдап эгелээн соонда, өске регионнардан вахта-биле ажылчыннар хөлезилээриниң орнунга, тус черниң чурттакчыларын ажылга хаара тудары ажыктыг дээрзин компаниялар биле берген. 2017 чылдың январь 1-ниң байдалы-биле, Кызыл-Таштыгның даг-болбаазырадылга комбинадында 825 кижиниң 69 хуузу Тываның чурттакчылары, а «ТарданГолд» КХН-де - 56 хуузу.