Альберт Кувезин Тываның Баштыңының шаңналының дугайында: ындыг аныяк назыда Найырал орденин алыры – ам-даа улуг чедиишкиннерге магадылал-дыр

 РФ-тиң Президентизиниң Чарлыы езугаар Найырал ордени-биле шаңнатканы дээш Тываның Баштыңы Шолбан Кара-оолдуң адынга байыр чедириишкиннери кээп турар. 

 Тываның Дээди Хуралының депутады, «Ятха» бөлүктүң лидери, ТР-ниң Улустуң артизи Альберт Кувезин Тываның Баштыңынга байырны чедирген: 

 - Бистиң Баштыңывыска шаңналды анаа-ла эвес тывыскан деп бодаар мен. Губернатор бүрүзүнге-ле ийи чылда күрүнениң орден, медалын ынчаар тывыспас. Россияның Президентизиниң шаңнаан кижилерниң даңзызын көрүңер даан. Ады-сураа билдингир балетмейстер Юрий Григорович, маадырлыг ужудукчу-шенекчи Селиванов… Анаа-ла душ бооп кирген кижи чок деп бодаар мен. А социал четкилерде хүнзедир бадыр соктанып олурар кижини эскербээн боор, ажырбас. Бистиң республикада аас-дыл база бар. Чамдыкта телевизор, интернет ажыдар хөңнүм шуут чок.  

 Найырал ордени бисти эптежиринче кыйгырып турар-дыр. Тайбыңны оштаан, чараш ат. Чоннар аразында, кижилер болгаш социал бөлүктер аразында найыралды быжыглааны дээш республиканың баштыңын шаңнаан деп санаар мен. Тывада Националдар херектериниң талазы-биле аңгы агентилелди тургускан. Ооң ажылының түңнелдерин манаар бис. Интернационалчы хөгжүмчү коллективте ажылдап турар мен. Ол турган-даа, ам-даа ажылдаар. Гастрольдап чорааш, Тыва дугайында стереотиптерни бо-ла дыңнаар бис, ындыг болзажок 10 чыл бурунгаар турганынга бодаарга, ол эвээжээн. Кижилер Тыва дугайында хөйнү билип алыр кылдыр, ону хөгжүм-биле, оон аңгыда бистиң ат-сураглыг чаңгыс чер-чуртуувус Сергей Кужугетович Шойгунуң ады-биле чедирип турар бис.

 Мээң таныырым кижилерден ындыг орденниг бир кижи бар – ам бистиң аравыста чок, Тываның хөөмейжизи Алдын-оол Севек. Ол шаңналын совет үеде алган, ынчан «Чоннарның найырал ордени» дээр турган. Күш-ажылын ниитилел үнелээн, ачы-хавыяазы дээш шаңналга төлептиг кижилерге кезээде өөрүүр мен. Ылаңгыя эштерим дээш. Бодум өмүнээмден республиканың Баштыңы Шолбан Валерьевич Кара-оолга байырым чедирдим. Ындыг аныяанда Найырал орденин алыры – ам-даа ажылдаарынга болгаш бурунгаарлаарынга магадылал-дыр.