2016 чылда Тываның муң хире чурттакчылары бедик технологиялыг эмчи дузазын халаска алган

 2017 чылда эмчи дузазын халас чедирер күрүне магадылалының территориалдыг программазын 6,5 млрд. рубль ажыг түңге бадылаан: республика бюджединиң акша-хөреңгизинден - 1261546,6 муң рубль база албан медицина камгаладылгазының акша-хөреңгизинден - 5301480,8 муң рубль. 

 Бистиң республиканың чурттакчылары бүдүн чыл дургузунда ол хире түңге халас эмчи дузазын ап болур. Халас эмчи дузазының чедингирин болгаш шынарын хандырары – программаның кол сорулгазы ол.

  Программа халас эмчи дузазы ап болур аарыгларның хевирлерин, негелделерин болгаш байдалын айыткан. Чижээ, халас эмчи дузазын алырынга тускай болгаш аар өртектиг бедик технологиялыг дузаны, дүрген эмчи ачы-дузазын, паллиативтиг дузаны алырын күрүне магадылап турар. Стационарга, хүндүскү стационар салбырынга, ол ышкаш тускай арга-хевирлер болгаш нарын медицина технологияларны ажыглаары негеттинип турар байдалдарда, эмчи реабилитациязынга эмчи дузазын халас чедирер.  

 2016 чылда Территориалдыг программаның акша-хөреңгизи-биле республиканың 932 чурттакчызы, ооң санында 719 улуг база 213 бичии кижилер бедик технологиялыг эмчи дузазын халас алган. 932 аарыг кижиниң 615-инге республиканың албан черлеринге бедик технологиялыг ачы-дузаны чедирген. Ол дээрге арын-чаак талазы-биле – 7, травматология база ортопедия – 158, чүрек-дамыр хирургиязы– 186, офтальмология – 161, нейрохирургия – 40, акушерство база гинекология – 63, неонатология – 112, уруглар травматологиязы болгаш ортопедия талазы-биле – 6 кезиишкиннерни кылганы-дыр. 

Федералдыг бюджеттиң акша-хөреңгизи-биле эрткен чылын 250 уруг болгаш 567 улуг кижи бедик технологиялыг эмчи дузазын алган.