РФ-тиң Чазаа «2014-2017 чылдарда база 2020 чылга чедир көдээ девискээрлерниң турум хөгжүлдези» программа-биле 2017 чылда Тывага бээр субсидияның хемчээлин бадылаан

 Федералдыг бюджеттен удур акшаладырыышкын-биле ол шупту 66 млн. 424,1 муң рубль болур. Россияның Чазааның даргазы Дмитрий Медведев ооң дугайында айтыышкынга атты салган. 

 Федералдыг Чазактың баштыңы: «Суур чурттакчыларының, оларның аразында аныяк өг-бүлелерниң болгаш специалистерниң чуртталга байдалын экижидеринче, социал болгаш инженерлиг инфраструктураны хөгжүдеринче, чурттакчыларының боттарының тус черде эгелээшкиннеринге грант деткмчезин көргүзеринче ол акшаларны тускайлаан»- деп чугаалаан.

  Тывага аңгылаан акша-хөреңгиниң хөй кезии – 40 млн. 898,6 муң рубли – суур чурттакчыларының чурттаар оран-сава-биле айтырыгларын шиитпирлээр.

 Суурнуң социал база инженерлиг инфраструктуразынче 25,1 млн. ажыг рубль субсидияны киириштирер. Ооң 11 млн. 51,9 муң рублин – суг хандырылгазының объектилеринче, 12 млн. 150 муңун – школаларже, 1 млн. 553 муңун – фельдшер-акушер пунктуларын хөгжүдеринче, 415 муң рубльди – черде спорт тудугларын тударынче угландырар. 

 Тываның суурларының чурттакчыларының эгелээшкиннеринге федералдыг бюджетте көрдүнген 355,6 муң рубльди грант деткимчези кылдыр үлээр.