Тываның Баштыңы Россияның Камгалал сайыды Сергей Шойгуну төрүттүнген хүнү - биле байырны чедирген

Май 21 - де Россияның Маадыры, Россия Федерациязының Камгалал сайыды Сергей Күжүгетович Шойгунуң төрүттүнген хүнү. Ол 58 харны харлап турар. Тываның Баштыңы республиканың чурттакчы чонунуң өмүнээзинден ат - сураглыг чаңгыс чер - чурттуунга төрүттүнген хүнүн таварыштыр байырны чедирген. Байыр чедириишкинниг телеграммада мындыг одуруглар бар:

-         Онза хүндүткелдиг Сергей Күжүгетович! Тыва Республикада хөй янзы язы - сөөк чурттакчыларының мурнундан болгаш бодумнуң өмүнээмден Силерниң төрүттүнген хүнүңер таварыштыр изиг байырны чедирерин чөпшээреп көрүңер. Силерниң Россияның сайзыралы дээш хөй талалыг күрүне чергелиг ажыл - агыйыңар, туруп - могавас тура - сорууңар, Ада - чурт дээш хамааты туружуңар болгаш бурунгаар хөгжүлде дээш чүткүлүңер кезээде үлегер чижек болуп чоруур. 

         Чаңгыс чер - чурттугларыңар Силерге онза хүндүткелдиг болгаш аажок чоргаарланып чоруурлар. Бодуңарның төрүттүнген чер - чуртуңарга бүгү талазы - биле ачы - дузаңар болгаш сагыш - салыышкыныңар дээш база улуу - биле өөрүп четтиргенивисти хүлээп ап көрүңер! Бүгү Россияның чурттакчылары - биле бир дөмей, Тываның чурттакчылары Россияның айыыл чок чоруун быжыглап, чепсектиг күштерин улам күштелдирип, амгы үеде хөй талаларлыг делегейге күрүневистиң адын бедик тудар  дээрзинге  бүзүрели улуг.

    Бо байырлыг хүнде, хүндүлүг Сергей Күжүгетович, Силерге каң дег кадыкшылды, аас - кежикти, тайбың  чуртталганы болгаш Улуг Россияның келир үези дээш күрүне чергениң нарын - берге ажыл - агыйынга чедиишкиннерни сеткилимниң ханызындан күзеп тур мен!

Онза хүндүткел - биле,

Тыва Республиканың Баштыңы  Ш. Кара - оол