Тываның Баштыңы: Ту-154 самолеттуң аңдарылганы – улуг хай-халап
26.12.2016
Россияның Камгалал яамызының Кара далай девискээринге аңдарылган Ту-154 бортунга Александров аттыг ансамбльдиң хөгжүмчүлери-биле кады 91 кижи чораан деп, ТАСС дыңнаткан. База ол ышкаш ансамбльдиң уран чүүл удуртукчузу Валерий Халилов база бар» - деп, «RT» агентилели дыңнаткан.
Айыыл-халапка таварышкан самолетка тос журналист, экипажтың сес кежигүнү база үдекчи алды кижи чораан. «Бирги канал» биле «Звезда» телеканал самолетка чораан боттарының ажылдакчыларының аттарын парлаан.
Тываның Баштыңы Шолбан Кара-оол Россияның камгалал сайыды Сергей Шойгуга кажыыдалын илереткен:
«Айыыл-халап... Сочиге аңдарылган Ту-154 самолетка Александров аттыг шериг ансамбль база Россияның кол шериг дирижеру Валерий Михайлович Халилов – биске эң чоок кижилер чораан. Тываның чүс чылдаанында маңаа келгеш, онзагай патриотчу концерттери-биле кожууннарны эргээш, республиканың чурттакчыларының чүректеринде арткан! Ынчангаш биске база дыка улуг чидириг. Валерий Халилов… – чугаалаар сөстер тыппас-тыр мен. Камгалал сайыды С.К. Шойгуга чаңгыс чер чурттугларывыстың мурнундан кажыыдалды илереттим. Пассажирлерниң эргим болгаш чоок кижилеринге база. Оларның улуг чидириин үлештивис» - деп, Шолбан Кара-оол соцчеткилерде бижээн.
Возврат к списку
|