Тываның Баштыңының Елказында тергиин дээн 10 өөреникчиге планшеттерни белекке берген

 Фойеге уругларны аңгы-аңгы тоолдар болгаш мультфильмнер маадырлары уткааш, «Бременниң хөгжүмчүлери» деп шиини көргүскен. Оюн-тоглаа үезинде уругларга чигирзиг белектерни тывыскан.

  Эртип турар чылда эң-не тергиидээн оолдар, уругларга 10 планшетти берген. 

 Кызылдың 8 дугаар школазының 9-ку классчызы Белова Настя технологияга школачыларның Бүгү-российжи олимпиадазының муниципалдыг чадазында 2016 чылда тиилээш, регион деңнелин эрткен. 

 Сүт-Хөл кожууннуң Кара-Чыраа суурдан алдыгы классчы Дондук Кежик өг-бүлезиниң санга сонуургалдыын уламчылап, техниктиг угланыышкынга салым-чаяанныын көргүзе берген. Кара-Чыраа суурга улуг хар чагган онза байдал үезинде, хар аштаар бөлүктү чыып, ачы-дузазын бир дугаарында чедирип эгелээннерниң бирээзи.  

 Танды кожууннуң Дүрген суурдан 4-кү классчы Иргит Танаа-Херел «Тыва дыл» мөөрейиниң тиилекчизи, тыва дылга муниципалдыг олимпиадага бирги, республика олимпиадазынга дөрткү черлерни ээлээн тергиин өөреникчи.  

 Кызыл-Мажалыктың 1 дугаар кшолазының 9-ку классчызы Кужугет Алина тергиин өөредилгелиг өөреникчи, спортчу (команда аайы-биле эштиринге база мини-футболга чемпион), «Дембилдей» ансамблиниң самчызы.  

 Кызылдың 11 дугаар школазының 3-кү классчызы Новиков Юрий ол хүн 10 харлаан. Эки өөреникчи, Округтуң Казактар ниитилели шимчээшкинниң киржикчизи, Кызылга ачы-буян концерттериниң база Красноярск хоорайга эрткен бүгү-российжи казачество следунуң киржикчизи.

 Кызылдың 12 дугаар школазының 10-гу классчызы Ондар Милан 2016 чылдың август 26-да эрес-дидим чоруун көргүскен. Милан эжи-биле кады көвүрүгден шурай берген херээжен кижиниң амы-тынын камгалаан. Ону ам Тываның кадет корпузунче удавас шилчидер.  

 Ак-Довурактың 4 дугаар школазының 3-кү классчызы Ооржак Кузел-Соруктуг 2016 чылдың ноябрьда, черде, дуза дилеп чыдар эр кижини көрүп кааш, дүрген дуза эмчилерин долгааш, ол кижиге улуг дузаны көргүскен. Тергиин өөредилгелиг, санга муниципалдыг олимпиаданың база оолдар аразынга «Эреспейлер» мөөрейниң тиилекчизи.  

 Мөңгүн-Тайга кожууннуң Мөген-Бүрен школазының 9-ку классчызы Салчак Саид малчын өг-бүледен. «Чүс ажыдыышкын болгаш тывыш» төлевилелде «Тергиин фотоажыл» номинацияга бирги черни ээлээн, эки өөреникчи. 

 Каа-Хем кожууннуң Сарыг-Септиң 2 дугаар школазының 8-ки классчызы Салчак Сайын-Белек эки өөреникчизи, спортчу, бокска республика маргылдаазынга үшкү, футболга «Хөм бөмбүк» республика маргылдаазынга бирги, Барнаул хоорайга футболга бүгү-российжи маргылдаага үшкү черлерни ээлээн.  

 Бай-Тайга кожууннуң Тээли школазының тергиин өөредилгелиг 8-ки классчызы Хертек Самба «Ада-чурт» республика конференциязынга 2-ги черни ээлээн, «Келир үеже базым» төлевилелдиң киржикчизи. Кожуунга улуг хар чаап турар үелерде, Кызыл-Дагда кырган-ача, кырган-авазының малчын коданынга улуг дузазын көргүскен.