Тывага уругларга Кванториум аттыг бирги технопаркты ажыдар
20.12.2016
2017 чылдың сентябрьга чедир Тываның найысылалы Кызылга школачыларга техниктиг чогаадылгаже хандыкшыырынга, ылаптыг эртемнерни өөрениринге база инженер ажыл-чорудулгазын шиңгээдиринге калбак арганы бээр уругларның бирги технопарыгы ажыттынар.
Ындыг паркты ажыдар дугайында ТР-ниң Өөредилге болгаш эртем яамызының белеткээни концепцияны Тываның Баштыңы Шолбан Кара-оол бадылаан.
«Южный» микрорайонунда Немелде өөредилге төвүнүң баазазынга ажыттынар уругларның технопарыгын «Кванториум» деп адаар. 600 дөрбелчин метр хире шөлдүг черге 800 хире оолдар, уруглар белеткенир. Өөредилгени беш угланыышкынга – автомобильдер конструкторлаары, авиамодель чогаадыры, робототехника, программалаашкын, биотехнология база бедик технологиялар талазы-биле чорудар.
РФ-тиң Президентизи В.В. Путинниң деткээни-биле Стратегтиг инициативалар агентилелиниң эгелээни программаны боттандырар дээш, ындыг төптерни тургузуп турарын сагындыраал.Тыва ол программага киришкеш, уругларның технопарыгын тударынга федералдыг бюджеттен акша-хөреңгини хаара тудар сорулгалыг.
Возврат к списку
|