Тываның эрге-чагыргазы хамаатыларның күш-ажылчы эргелерин хажыдып турар ажыл берикчилери-биле демиселди күштелдирер

 Республиканың Күш-ажыл яамызы «чагаа хавында» шалың акшазы ап турарларга «изиг телефонну» ажыткан. 

 Ажыл берикчилери ажылдакчыларынга чажыт шалыңны берип тура, чүгле үндүрүг төлээринден ойлап эвес, а келир үеде ажылдакчыларының алыр төлептиг пенсиязын, база бо үеде алыр ужурлуг социал магадылалдарын болгаш чиигелделерин кызагдап турарын специалистер тайылбырлаан.

 «Кижилер ээлчеглиг шөлээзиниң, иштиг болгаш божааны-биле холбашкан шөлээлериниң, уругну бир хар чартыкка чедир ажаап-карактааны дээш пособиезиниң төлевирлерин албайн турар. Бүдүрүлгеге озал-ондактан ийикпе, азы ажыл-мергежили-биле холбашкан аарыгдан «аараанының хуудузун» азы компенсациязын төлеттирип алыр аргазы чок. Ооң кадында, ажылдап алган акшазынга база күш-ажыл стажынга үндезилээн алыр ужурлуг пенсиязы чок артып каап болур» - деп, яамының удуртукчузу Людмила Тас-оол чугаалаан.

 «Чагаа хавында» шалың төлевири ап турар ажылдакчы социал болгаш өнчүге дээш тырткан түңнү долу хемчээли-биле ажыглап шыдавазындан, ипотека азы хереглел чээлизи алыр аргазы чок. 

 2015 чылда, кол кезиинде хуу бүдүрүлгелерде, 6 муң кижи-биле күш-ажыл керээлери чардынмаанын, республиканың Күш-ажыл яамызы илереткен. 2016 чыл төнмээн-даа болза, ындыг кижилерниң саны 3 муң ашкан. Ындыг болзажок, Тывада 13,5 – 14 муң хире кижи «чагаа хавында» шалың акшазы ап турар чадавас деп, яамы дыңнаткан. 

 Республиканың чурттакчылары чүгле чурум хадыжыышкыннарын дыңнадыр дээш эвес, а ажылга тургустунарынга болгаш үнеринге хамаарышкан күш-ажылчы эргелериниң айтырыгларын сүмележип, халас тайылбырларны ап болур.