Студентилер болгаш волонтерлар орус-тыва сөстүктү электроннуг хевирже шилчидип эгелээн

 Кызылга Тыва дыл хүнүнге тураскааткан тыва дыл талазы-биле I республика шуулганының үезинде, Тываның Баштыңы Шолбан Кара-оол Тываның гуманитарлыг болгаш социал-экономиктиг тускай шинчилелдер институдунга база ТР-ниң Баштыңының Администрациязының Информастыг политика департаментизинге интернет четкизинге орус-тыва болгаш тыва-орус сөстүктерниң (словарьларның) электроннуг хевирин тургузар ажылды дааскан.  

 Тываның гуманитарлыг болгаш социал-экономиктиг тускай шинчилелдер институду эртем архивинден 600 арынныг сөстүктү тургузуп, ажык кириишкин-биле хостуг ажыглаарынга чөпшээрелди кылдырып, организастыг хемчегниң бирги чадазын чоруткан.  

 Информастыг политика департаментизи Тываның күрүне университеди-биле ам кады ажылдажылганың өске чадазын эгелээн: медээлерни хынавышаан, аңгы-аңгы хевирлерден ону анаа электроннуг документ хевиринче шилчидерин. Филология факультединиң тыва филология болгаш ниити дылдар эртеминиң кафедразының студентилери биле республиканың аныяктар организациязының волонтерлары ол ажылда киржип турар. Бо хүннерде Тываның күрүне университединиң чаа лаборатория корпузунда, 30 компьютер-биле дерээн ийи аудиторияда электроннуг хевирже сөстүктү шилчидип турар.

 Республика Баштыңының саналын боттандырар ажылдың идепкейжизи, үшкү курсчу Шолбан Соян студентилерге болгаш школачыларга сөстүктүң ажыының дугайында чугаалаан: 

 «Тыва филологияның студентилери төрээн дылывысты кадагалап, ону келир салгалдарга арттырар ужурлуг бис. Бөгүн аныяктар аразында дыка хөй тыва оолдар, кыстар тыва дылывысты чегей билири харааданчыг. Дылды шиңгээдип алырынга, кудумчуга кандыг-бир танывазы сөстү көрүп кааш, интернетте сөстүктен ол сөстүң утказын билип алырынга электроннуг сөстүк дыка ажыктыг деп санаар мен. Орус-тыва база тыва-орус электроннуг сөстүктер – алызында тыва дылды сайзырадыры-дыр, ол чоннуң культуразынга база хамааржыр. Өске язы-сөөк чоннарга бистиң дылывысты өөрениринге, бистиң культуравысты билип алырынга дыка чугула». 

 Информастыг политика департаментизиниң начальниги Али Кужугет студентилерге сөстүк-биле канчаар ажылдаарын тайылбырлаан. PDF биле DOC хевирде арыннарны аныяктарда үлээн, төлевилелди күүседириниң хуусаазы оларның дүргенинден болгаш тывынгырындан хамааржыр, белен эвес ажыл деп, ол чугаалаан:  

 «Республиканың Баштыңы Шолбан Валерьевич кончуг үезинде даалганы берген, бичии чедир кылыр ажылдар турган чүве, ооң деткимчези-биле ол төлевилелди дарый эгелээр арганы тыптывыс. Студентилер ажылын доозуптары билек, сайтыларга сөстүктү быжыглаар хевирин тургузар планныг бис. Ол бистиң ажылывыстың дараазында чадазы-дыр». 

 Орус-тыва сөстүктүң электроннуг хевиринче сөстерни шилчидеринге план езугаар ийи неделя үнер ужурлуг. Тыва дылды хөгжүдеринге, ону чоннуң культурлуг байлаа кылдыр арттырарынга бодунуң үлүүн киириштириксээн республиканың бүгү чурттакчылары ол чугула ажыл-чорудулгага киржип болурун төлевилелдиң удуртукчузу Али Кужугет дыңнаткан. 

 Ону кылырда depinfo@rtyva.ru адресче СЛОВАРЬ деп сөс-биле бодунуң чагыын киирер.