ТЫВАНЫҢ БАШТЫҢЫ ШОЛБАН КАРА-ООЛ РОССИЯНЫҢ ӨӨРЕДИЛГЕ БОЛГАШ ЭРТЕМ САЙЫДЫ ОЛЬГА ВАСИЛЬЕВА-БИЛЕ УЖУРАШКАН

 Тываның Баштыңы Шолбан Кара-оол РФ-тиң Өөредилге болгаш эртем яамызынга бистиң республикага уруглар садтарын тударының аңгы программазын тургузарының дугайында чугааны кылган.

  Школа назы четпээн өөредилгениң өг-бүле бүрүзүнге чедингир чоруун ук яамының чаа удуртукчузу Ольга Васильева-биле сайгарган.

 Өзүп төрүүр чоруктуң талазы-биле чуртта эң бедик көргүзүглүг республикада уруглар садтарының айтырыы эң чидиг болуп турар дээрзин Шолбан Кара-оол сайытка дыңнаткан. Сөөлгү үш чыл дургузунда школа назыны четпээн албан черлеринге 10 муң ажыг олуттар немешсе-даа, бо айтырыг шиитпирлеттинмейн турар.  

 «Россияның чаа томуйлаткан өөредилге болгаш эртем сайыды Ольга Юрьевна Васильева-биле таныжып алдым. Ийи чыл дургузунда чеди чаа уруглар садтарын туткан бис, оон аңгыда садикке тааржыр оран-саваны эде кылдывыс. Оочур 6 муң кижиге кызырылган. Өзүп төрүүр чоруктуң көвүдеп турарындан уруглар садтарынга негелде ам-даа улуг. Ынчангаш уруглар садтарын моон соңгаар-даа федералдыг төптүң дузазы-биле тудар ужурлуг бис. Ол айтырыгның болгаш Кызыл хоорайга чаа школаның, гуманитарлыг болгаш тускай социал-экономиктиг шинчилелдер институдунуң корпузунуң тудуунуң дугайында Ольга Юрьевна-биле чугаалаштывыс. Бистиң республикага өөредилгени сайзырадыр айтырыгга улуг сонуургалдыг чорду. Дээди эртем чок уругларлыг өг-бүлелерниң уругларын дээди өөредилге черинче хүлээп алырының дугайында бистиң төлевилеливис ону аажок сонуургаткан. Ол ышкаш орус дылдыг башкыларны Тываның көдээ школаларынче грантыга үндезилеп хаара тудуп турар төлевилеливисти ол деткээн. Сырый кады ажылдажылга дугайында дугуруштувус» - деп, республика Баштыңы бодунуң блогунда бижээн. 

 Ол ужуражылгага Кызыл хоорайга 825 олуттуг школаның тудуун уламчылаарының, Тываның гуманитарлыг болгаш тускай социал-экономиктиг шинчилелдер институдунуң оран-савазын чаартып кылыр ажылды доозар немелде акшаландырыышкынның дугайында база чугаа болган.