НОЯБРЬ ТӨНЧҮЗҮНДЕ КЫЗЫЛДА ШЕРИГ ХООРАЙЖЫГАЖЫН АЖЫГЛАЛГА ДУЖААРЫ ПЛАННАТТЫНГАН

 Бөгүн Тываның Баштыңы Шолбан Кара-оол РФ-тиң камагалал сайыдының оралакчызы Тимур Иванов база Төп шериг округунуң шериглериниң командылакчызы Владимир Зарудницкий олар-биле Россияның Камгалал яамызының тудуг объектилерин хынаан. 

 Бир дугаарында, шериг албанныгларның болгаш оларның өг-бүлелерин көжүрер 55-ки мото-адыгжы бригаданың баазазы кайы хире беленин хынап четкен.  

 Казарманың, өөредилге корпузунуң, шериг хоорайжыгажының штавының оран-савазын хынап тура, чылыг хандырылгазын, техниктиг дерилгени хандырар база шериг албанныгларның чурттаарын, амыдырал-хандырылгазын болгаш чедирип-эккээрин организастаар талазы-биле ажылдарны үе-шаанда доозар херек деп демдеглээн. 

 Шериг баазазын ажыглалче хүлээп алырының актызынга албан езузу-биле ат салыр хүн – ноябрь 26-га чедир ажылды доозар сорулганы салган. Хоорайжыгашты ажыдарының белеткел ажылдарын хайгааралга алыр дээш ажылчын бөлүктүң элээн каш шериг дужаалдыглары найысылалда артып каан. 55-ки мото-адыгжы бригаданың команда составының шериг албанныглары бо чоокку хүннерде Тываның найысылалынче чедип кээр.