Шолбан Кара-оол чонунга улам чоок болу берген

 Тываның кайы-даа кожуунунга Шолбан Кара-оол чеде бээр болза, ону чылыы-биле уткуп алырлар. 

 «Аныяк өг-бүлеге кыштаг» база «Инек – чемгерикчи малым» төлевилелдерни сүмелээш, «өзээнге дегген» дээр ийикпе. Көдээ ажыл-агыйны база тус черниң бүдүрүкчүлерин хөгжүдери-биле ооң мурнунда база хөйнү кылган. Ооң бир чижээнге, Тывада эң-не нептереңгей болгаш билдингир губернатор төлевилели – «Чаңгыс суур – чаңгыс бүдүрүлгени» хамаарыштырып болур. Суурларда сүт болгаш эът болбаазырадылгазының биче цехтерин ажыткан элээн каш сагынгыр-тывынгыр кижилерни ынчалдыр илереткен. Боттуң бүдүрүлгезиниң продуктулары рынокту ээлеп, өскээрден киир сөөртүп эккелген аъш-чемни үндүр кызып эгелээн деп болур. 

 Ам Шолбан Кара-оол чонунга улам чоок болу берген. Мал ажыл-агыйынга шымнып киреринге белен, аныяк 105 өг-бүле 200 баш хой, кажаа-хораа база чурттаар оран-саваның боттуг деткимчезин алган. Тус черниң муңчу малчыннарындан шээр малды үзүп бергеш, дамчыдып эгелээн. Келир үениң 100 хире малчыннары ам эгелээр ажыл-ижинден өөрүшкү-маңнайны алганы ол.  

 Оон аңгыда, бо чылын кризиске удур хемчеглер планы езугаар, республиканың 123 суурларында 369 ажылгыр өг-бүлелерге республика бюджеди-биле саткан саар инектерни үлээр.  

 Кажан Шолбан Кара-оол ол төлевилелдерин саналдап турда, ооң боттанырынга чигзинип турганнар база бар. Ам Тываның хову шөлдеринде, ыраккы суурлар чоогунда чаа кыштаглар туттунуп, хөй ажы-төлдүг болгаш эвээш орулгалыг өг-бүлелер боттарының инээниң сүдүн ижип, оон кылган ак чемнерни чип турары – төлевилел күүселдезиниң көскү барымдаазы апарган.