Татарстан биле Тываның кады боттандырар төлевилелдерин Москвада сайгарган

 Татарстанның чазак даргазы-сайыттың оралакчызы – РФ-тиң Татарстан Республикада бүрүн эргелиг төлээзи Равиль Ахметшин биле Тыва Республиканың экономика сайыды Елена Каратаева база Москвада Тываның бүрүн эргелиг төлээзиниң бирги оралакчызы Светлана Намчак олар ужурашкан. 

 Ужуражылга Татарстанның Бүрүн эргелиг төлээ черинге эрткен. Аңаа ТР-ниң бүрүн эргелиг төлээзиниң экономиктиг болгаш делегей айтырыгларының талазы-биле оралакчызы Булат Миннуллин, экономика, инновация база инвестиция талазы-биле ажыл-чорудулга адырында программаларны хандырар секторнуң эргелекчизи Фаннур Гарифуллин база киришкен. 

 Бо чылдың июль 1-де, Тывага Татарстанның Президентизи Рустам Минниханов ажыл-агый аайы-биле кээп чорда, дугуржулга чардынганын сагындыраал. Татарстан биле Тываның ат салганы, регионнар аразында садыг-экономиктиг, эртем-техниктиг, социал база культурлыг кады ажылдажылга дугайында дугуржулгада демдеглеттинген төлевилелдерни болгаш хемчеглерни боттандырар талазы-биле кады ажылды организастаарын ийи тала сайгарган. 

  Тыва энергетика база IT-технологиялар адырынга кады ажылдажылганы чорударынга, база Кызыл биле Казань аразынга авиация аргыжылгазын ажыдарынга сонуургалдыг дээрзин, РФ-тиң Татарстан Республикада бүрүн эргелиг төлээ чериниң парлалга албаны дыңнаткан. 

 Регионнар аразының кады ажылдажылгазының кол угланыышкыннарынга культура, туризм база өөредилге адыры хамааржыр. Республиканың аныяктарын Татарстанның дээди өөредилге черлеринге өөредиринге Тыва сонуургалдыг.  

 Ужуражылганың төнчүзүнде ийи тала суй-белектерни солушкан. Аалчылар Равиль Ахметшинге хүндүткел болгаш эп-сеткилдиң демдээ - сарыг кадакты сунган.