«Кадыкшылдың маршруду»: эмчилер Таңды кожууннуң чурттакчыларын шинчээн

 Июнь 22-23 хүннеринде республика эмчилери «Кадыкшылдың маршруду» губернатор төлевилели-биле, Таңды кожууннуң Балгазын биле Бай-Хаак суурларга чедип, чурттакчы чоннуң калбак шинчилгезин эрттирген. 

  Кардиолог 152 кижини шинчээш, 116 кижиниң ханының базыышкыны улуг дээрзин тодараткан. 11 кижи чүректиң хан-дамыр аарыглыын, чүгле 16 кижи кадык деп түңнелди үндүрген.  

 Таңды кожууннуң 89 чурттакчызы, оларның аразында бажында кемдээшкинниг кижилер неврологдан консультацияны алган. Дермато-венеролог 34 аарыг кижини хүлээп, 132 анализти алган. Психолог чурттакчы чон-биле профилактиктиг чугааны чоруткан. 

 92 кижиниң дамырларын УЗИ эмчизи хынаан. Хөй кезии кадык-даа болза, 9 кижиниң дамырлары чиңгелээнин, 4 кижиде аарыг барын илереткен. 

 Балгазын суурнуң чурттакчызы Ольга Дыртый-оол (29 харлыг) көжүп чоруур бөлүктүң эмчилеринге өөрүп четтиргенин илереткен: «Эмчилер келген деп эки медээ дыңнааш, дыка өөрдүм. Кызылга эмчилеп чедери дыка берге, ындыг болзажок «Кадыкшылдың маршруду» губернатор төлевилелиниң ачызында тускай эртемниг эмчилерге кирип, шинчидип алыр арга тургустунганынга өөрүп тур мен».