Тываның өөредилге болгаш эртем сайыдының оралакчызы: шупту башкыларга шөлээ акшазын озал чокка шилчиткен, консультация шактары дээш төлеп турар

 Башкыларның шөлээ акшазының санаашкыны база шылгалдалар мурнунда консультация шактары дээш төлевир талазы-биле айтырыгны социал четкилерниң дыка хөй ажыглакчылары көдүрүп турар. 

 Тыва Республиканың өөредилге болгаш эртем сайыдының оралакчызы Ольга Доржу ол айтырыгга харыыны берген: 

 - Эге класс башкыларының шөлээ төлевиринче баштайгы шилчилге 2016 чылдың июнь 3-те кирген болгаш ону муниципалдыг өөредилге черлеринче шилчиткен. 2016 чылдың июнь 15-те, 660 млн. рубль түңнүг ийиги шилчилгени арткан башкыларның, школа назыны четпээн уруглар албан черлериниң ажылдакчыларының база өскелерниң-даа шөлээ төлевиринче тускайлаан. Муниципалдыг өөредилге албан черлериниң база школаларның дыңнадыы-биле алырга, июнь 22-ге чедир башкыларның шөлээ акшаларын база өске-даа төлевирлерин төлээн. 

 Бир эвес кандыг-бир айтырыг тургустунуп келзе, Тыва Республиканың Өөредилге болгаш эртем яамызында 8 (39422) 61858 дугаарлыг "изиг шугум" телефонунче долгап болур. База ол ышкаш 8 (39422) 61596 дугаарлыг мээң телефонумче долгааш, чүгле шөлээге хамаарыштыр эвес, а шалың акшазының дугайында тайылбырны  ап болур.  

 Консультация эрттиргениниң төлевириниң дугайында. Консультациялар – башкыларның күүседири албан хүлээлгези-дир. Доостурар эртеми болза, консультация шактарын эрттирери албан. Өөредилге албан черлеринде ол шактарны төлеп турар. Тариф езугаар төлевирлиг, 36 шак аңаа көрдүнген.