Шолбан Кара-оол Ураза-байрамны демдеглеп турар российжи регионнарның губернаторларынче байырлыг телеграммаларны чоруткан

 Бөгүн бүгү делегейде мусульманнар Ураза-байрам байырлалын демдеглеп турар. Хүн ашкыжеге чемненмес база суксун ишпес сагылды сагаан Рамадан айы төнгенин российжи тос регионда – Татарстан, Чечня, Ингушетия, Дагестан, Башкортостан, Карачаево-Черкесия, Адыгея, Кабардино-Балкария, Крымда байырлап, дыштанып турар. 

  Россияның Президентизи Владимир Путин ислам чүдүлгелиг российжилерге байырны чедирген.  

 Тыва Республиканың Баштыңының хүлээлгезин күүседип турар Шолбан Кара-оол российжи регионнарның губернаторларынче телеграмманы чорудуп, байырлыг сөстерни бүгү чүдүкчүлерге база коллегаларынга дамчыткан. 

  «Тываның хөй националдыг чонунуң мурнундан, Рамадан айы төнгенин байырлаан Ураза-байрам байырлалы-биле, Россияның шупту мусульманнарынга база губернатор коллегаларымга байыр чедирип тур мен. Бо ыдыктыг хүнде сеткилдиң ханызындан кадыкшылды, аас-кежикти, өөрүшкүнү база бистиң чуртувустуң чаагай чоруу дээш оон-даа ыңай чедиишкинниг ажыл-чорудулганы күзедим» - деп телеграммада бижээн. 

  Ураза-байрам хүнүнде чаагай чорукту кылырга, сагылың күүсеттинген деп санаар. Ооң мурнунда финиктер база тараа аймаан бээр турган болза, амгы үеде акша-копеекти өргүүр. Ол хүн чыгдынган өргүлдү, шажын чүдүлгези хамаан чокка, дуза дилээн кижилерге үлээрин Мусульманнарның шажын эргелели дыңнаткан.