Тыва Татарстанның президентизи Рустам Миннихановту кайгаткан

 Дүүн Татарстан Республиканың Президентизи ажыл-агый аайы-биле Тывада келген. Тываның Баштыңы Шолбан Кара-оол июнь 30-де бодунуң коллегазы, хүндүлүг аалчыга республиканың тураскаалдыг черлерин сонуургаткан, а бөгүн Тываның Чазааның бажыңынга ажыл-агыйжы ужуражылга болуп эрткен. 

 Российжи регионнарның удуртукчулары экономика, эртем болгаш культураның аңгы-аңгы адырларынга кады ажылдажылга айтырыгларын чугаалашкан. 

 Шолбан Кара-оол татар биле тыва чоннар ук төөгүзүнден база сагыш-сеткилинден төрел чоннар дээрзин демдеглеп, Тывага кээрин шиитпирлээни дээш, Рустам Миннихановка өөрүп четтиргенин илереткен:

  «Бөгүн Татарстан Россияда үлетпүр хөгжүлдезиниң талазы-биле лидерлерниң бирээзи, инфраструктуразы бедии-биле сайзыраан регион. Ынчангаш чурттуң өске субъектилери аңаа деңнежир сорулгалыг. Территорияларывыста хөгжүлдениң аңгы-аңгы угланыышкыннарында ниити чүүлдү черле тып алыр бис деп бодаар мен».  

 Рустам Минниханов Тыва кайгамчык-тыр дээрзин демдеглээн. Татарстандан делегация кежигүннери тыва чоннуң культуразы болгаш ужур чаңчылдары-биле танышкаш, оларныынга чоок чүүлдер хөйүн эскерген:

  «Дөстеривис ниити дээрзин бистиң төөгүвүс чугаалап турар, ынчангаш меңээ маңаа турары дыка эки-дир.  

 Россия Федерациязының бот тускайлаң регионнары болганывыста, экономиктиг, культурлуг солчулга, эртем курлавырында кады ажылдажылганы хөгжүдери чугула. Бөгүн ат салганывыс дугуржулганың ачызында Татарстан Республика биле Тыва Республиканың чоннары ам-даа чоокшулажып, эптежиринге бүзүрээр мен. 

 Тыва – курлавыры хөй, улуг перспективалыг регион. Бир эвес республиканың социал-экономиктиг хөгжүлдезиниң талазы-биле бодалдары база планнары амыдыралга боттаны бээр болза, Тываның чечектелиишкининге ол улуг идиг болур». 

  Татарстанның Президентизи чылыг, эш-хуу хүлээп алыышкыны дээш Тываның Баштыңынга өөрүп четтиргенин илереткеш, бүгү тыва чонга чаа-чаа чедиишкиннерни болгаш чаагай амыдыралды күзээн.  

 Тыва Республиканың Чазааның кежигүннериниң киржилгези-биле эрткен хуралга Тыва Республика биле Татарстан Республиканың аразында садыг-экономиктиг, эртем-техниктиг, социал болгаш культурлуг кады ажылдажылга дугайында дугуржулгага аттарны салган.