Тывадан 89 өг-бүле «Чемгерикчи инек малым» губернатор төлевилели-биле инектерни алган

  Губернатор төлевилелин бүрүнү-биле боттандырарынга бюджеттен 13 млн. 689,9 муң рубль саң-хөө деткимчезин берген. Ол түңче Тываның араттарындан малды садып алыр акшадан аңгыда (бир инекке 35 муң рубль), бызаалыг инекти 2,1 муң рубльге камгаладырының чарыгдалы база кирип турар. 

  Төлевилел езугаар көрдүнген ол акша-хөреңги-биле 365 баш малды саткаш, конкурс шилилгезин эрткен хөй ажы-төлдүг база эвээш орулгалыг өг-бүлелерге дамчыдар. Бо хүнге чедир 245 арат ажыл-агыйлары-биле малды тускайлаар дугайында керээ чардынган. Мал камгаладылгазының керээзин чарар мурнунда, инектерни имнеп, малдың баш санын учетка алган. Амдыызында Кызыл, Эрзин база Мөңгүн-Тайга кожууннар дамчыдар малдарның чамдыызын демдеглээн болза, өске черлерде ажылдар уламчылап турар. 

  Экономиктиг кризис үезинде, көдээ суурларда эвээш хандырылгалыг болгаш социал камгалалы кошкак өг-бүлелерни деткиир дээш, «Чемгерикчи инек малым» төлевилелди ажылдап кылган. «Эвээш орулгалыг, ажы-төлдүг өг-бүлелерниң огородтары база херим-кажаазы куруг турбас кылдыр ажылды чорудаалыңар» - деп төлевилелдиң ужур-утказын республика Баштыңы тайылбырлаан. 

 2018 чылга дээр боттандырар төлевилелде, бөгүн, 123 суурлардан 3-3 киржикчи киржип турар. Төлевилелге киржир кордакчыларның өг-бүлезинде 1545 ажы-төл бар. Өг-бүлелер-биле социал керээни чарган, ооң негелдези-биле 2 чыл алганы малының бажын «Чемгерикчи инек малым» төлевилелдиң дараазында киржикчилеринге дамчыдар хүлээлгелиг. Ооң соонда керээ күүсеттинген деп санааш, малды өг-бүлениң өнчүзү кылдыр дамчыдар. Бир эвес төлевилел чедимчелиг болур болза, ону 2018 чылга чедир узадырын Тываның чазаа санап турар.