Азияның төвүнде Улуг-Хемниң эриинге, Россия хүнүнде, күрүне шаңналдарын байырлыг байдалга тывыскан

 Бо онзагай хүнде күрүне шаңналдарын тыпсыры – ханы уткалыг. Төрээн чериниң, улуг чуртунуң сайзыралы, хөгжүлдези дээш үлүг-хуузун киирип чоруур аңгы-аңгы мергежилдерниң улуг-даа, бичии-даа кижилери шаңналдарга төлептиг болган. 

 Россияның Чазааның чанында Россияның күрүнениң шериг төөгү-культура төвүнүң «Россияның патриоду» тураскаал медальдарын чылдың-на Россия хүнүнде тыпсыры чаңчыл болган. Патриотчу кижизидилге ажылынга улуг үлүүн киирген бистиң чаңгыс чер чуртугларывыс, үш башкы медальдарның эдилекчилери болган. Кызылдың 5 дугаар гимназиязының айыыл чок чорук албанының удуртукчузу ВОЛОБУЕВА Елизавета Борисовна; Кызыл кожууннуң өөредилге эргелелиниң кижизидилге ажылының талазы-биле методизи МОНГУШ Елена Кужугетовна; Таңды кожууннуң Сосновка школазының немец дыл башкызы СЫРГАШЕВА Светлана Алексеевна олар дээди шаңналдарны алганнар. 

 Тудуг адырында чедиишкиннери дээш Тыва Республиканың Баштыңының өөрүп четтириишкинин ТР-ниң тудуг сайыдының оралакчызы ТЕРДЖАНЯН Размик Меружановичиге чарлаан. 

 Россия Федерациязының наркотиктер саарылгазынга контроль талазы-биле федералдыг албанның Тыва Республикада эргелелиниң начальниги, полицияның полковниги МАКАРОВ Вячеслав Михайловичиге наркоконтроль органнарынга үре-түңнелдиг ажылы база бедик профессионал чоруу дээш «Тыва Республиканың алдарлыг ажылдакчызы» атты тывыскан.  

 Улуг-Хем кожуундан өөредилгениң хоочуну ПРЯХИНА Лидия Васильевнага аныяк-өскенни өөредип, кижизидеринге ачы-хавыяазы база өөредилге адырында хөй чылдарда ак сеткилдиг ажылы дээш «Тыва Республиканың өөредилгезиниң алдарлыг ажылдакчызы» хүндүлүг атты тывыскан. 

  Культура болгаш хөгжүм уран чүүл адырында ачы-хавыяазы база хөй чылдарда чогаадыкчы ажылы дээш, Тыва культура төвүнде «Тыва» ансамблиниң артизи ОНДАР Шолбан Анатольевичиге «Тыва Республиканың алдарлыг артизи» хүндүлүг атты тывыскан. 

 Национал идик-хепти даараарда улусчу ус-шевер аргаларны ажыглап чорууру, тыва уран чүүлдү суртаалдаарынга идепкейи база шеверлерни белеткеп, өөредиринге улуг үлүү дээш , «Довурзак» ательениң быжыкчызы ДАМБА Айлаана Клим-ооловнага «Тыва Республиканың улустуң мастери» хүндүлүг атты ол хүн тывыскан. 

 «Шын» солуннуң культура килдизиниң редактору БАЛЧЫР Светлана Салчаковна, харылзаа болгаш полиграфия адырын хөгжүдеринге ачы-хавыяазы дээш, Тыва Республиканың «Шылгараңгай күш-ажылы дээш» медалы-биле шаңнаткан.  

 Россияның федералдыг айыыл чок албанының Тыва Республикада Кызыгаар эргелелиниң начальниги, полковник ТРУХАНОВ Евгений Евгеньевичини хөй чылдарда сыныш чок албаны, албан хүлээлгезин үлегерлиг күүседип чорууру база бедик профессионал мергежили дээш Тыва Республиканың «Шылгараңгай күш-ажылы дээш» медалы-биле шаңнаан. 

 Тыва Республикада Өрт албанының тургустунганындан бээр 90 чылы база үлегерлиг албан-хүлээлгези дээш, өрт камгалалының хоочуну, иштики албанның халажылгада полковниги МОНГУШ Николай Мыйтын-ооловичини «Буян-Бадыргы» орденниң III чергези-биле шаңнаан. 

 Ыры болгаш танцының «Саяннар» ансамбли байырлал концертин чыылганнарга бараалгаткан.