Шолбан Кара-оол «Технопром-2016» технологтуг хөгжүлдениң делегей форумунга киржир

 Тываның Баштыңының албан хүлээлгезин күүседип турар Шолбан Кара-оол, июнь 9-та, Новосибирск хоорайга ажыттынар «Технопром-2016» технологтуг хөгжүлде талазы-биле делегей форумунуң ажылынга киржир. 

 РФ-тиң Президентизиниң СФО-да бүрүн эргелиг төлээзи Н.Е. Рогожкин база РФ-тиң онза байдалдар сайыдының оралакчызы А.П. Чуприянның даргалааны ажылчын бөлүктүң хуралынга, «Айыыл чок хоорай» аппарат-программалыг комплексти ажыглалга киирип, ону сайзырадыры-биле холбашкан айтырыгларны сайгарар. 

 База ол ышкаш Российжи-Герман даштыкы садыг палатазының баштаар чериниң чаа соңгуткан даргазы Маттиас Шепп-биле ажыл-агыйжы ужуражылганы эрттирери база Тыва Республиканың Чазаа биле РФ-тиң Үлетпүрнү хөгжүдер фондунуң аразында кады ажылдажылга дугайында дугуржулгага атты салыры планнаттынган.