Тываның Баштыңы хүрешке тиилээн бичии мөгелерни шаңнап, школа-интернаттың элээди футболчуларынга бөмбүктерни белекке берген

 5-тен 16 харлыг оолдар аразынга назы-хар аайы-биле алды бөлүктү чарган. Кызылдың 9 дугаар школазының өөреникчизи, билдингир мөгениң база аныяктар херээ болгаш спорт сайыдының оралакчызының аттажы – Биче-оол Буянны Шолбан Кара-оол демдеглээн. Чавыс дурт-сынныг бо оол, бодундан ийи баш бедик оолдарны, ша-даа чедирбейн октап кааптар болган. Буян - дзюдога Сибирьниң чемпиону база. «Шыырак спортчу өзүп олурарынга бүзүрээр мен. Буянга чедиишкиннерни күзедим!» - деп, Шолбан Кара-оол чугаалаан. 

 Диңмиттиг адыш часкаашкыны база уругларның, оларның ада-иезиниң каткызы-биле , Сесерлигден 12 харлыг бодунуң аттажынга Шолбан Кара-оол база ужурашкан. «Дыка солун-дур!» - дээш, республика баштыңы езулуг мөге дурт-сынныг оолду бодунче чыыра тырткаш, бүгү-ле чүүлдерге чүгле экини күзээн. 

 Чазак Даргазы бодунуң өг-бүлезиниң өмүнээзинден, Уруглар камгалалының хүнү-биле, иттинер тергелерни хүреш маргылдаазының эң-не бичии киржикчилеринге берген. 

 Ол-ла хүн республика баштыңы Национал паркта, ажык дээр адаанда тургускан, көжүп чоруур библитеканың ажылын база сонуургаан. Көжүп чоруур библиотека комплекизи Тываның дыка хөй кожууннарынга чедип каапкан. Амгы үениң технологиязы-биле чепсегленген библиотека муң ажыг аттыг номнар база журналдарны номчукчуларга сүмелеп чоруур. Эртип турар хемчеглерге таарыштыр темаларны шилип ап турар: уругларга болза, оларга таарыштыр бижээн номнарны. «Библиобустуң» планында хоочуннар бажыңынга чедери, Кызылдың Арбадынга чаа номну таныштырары, Национал библиотекалар хүнүнде Минусинск хоорайга баары көрдүнген. Тываның Баштыңы А.С. Пушкин аттыг Национал библиотека фондузунче уругларга энциклопедия номнарын дамчыткан. 

 Чоокта чаа Сочи хоорайга, уруглар бажыңнары база школа-интернаттар командаларының ортузунга, футболга XI ажык бүгү-российжи маргылдааларга ийиги черни төлептии-биле ээлээн республиканың школа-интернадының бичии бут бөмбүкчүлеринге Шолбан Кара-оол байырны чедирип, бут бөмбүктерин белекке берген.