Закрыть
Логин:
Пароль:
Забыли свой пароль?

Войти    

«ТЫВАЭКСПО-2016. ЧАС» ярмаркага Россияның 12 регионундан сайгарлыкчылар киришкен

 «ТЫВАЭКСПО-2016. ЧАС» ярмаркага Россияның 12 регионундан сайгарлыкчылар киришкен 31.05.2016
 Тываның найысылалы Кызылга, майның 27-29 хүннеринде, «ТЫВАЭКСПО-2016. Час» регионнар аразының ХV универсалдыг делгелге-ярмарказы болуп эрткен. Сайгарлыкчылар неделязынга деңнештирген ол хемчегге Москва, Санкт-Петербург, Новосибирск, Томск, Омск, Оренбургск, Челябинск база Кемерово областардан, Красноярск база Алтай крайлардан, Хакасия база Тыва республикалардан биче болгаш ортумак бизнестиң төлээлери киришкен. 
 «ТываЭкспо-2016. Час» бодунуң ажыл-агыйжы шөлүнге 90 киржикчини, Тывадан 47 сайгарлыкчыны хаара туткан. Делгелгени 16 муң кызылчылар база найысылалдың аалчылары сонуургаан. Ярмарканың бараан саарылгазының ниити түңү, дугуржулгалар-биле катай 20 млн. рубль болган. 
  «ТываЭкспо» ярмаркалар чылда ийи катап, чазын база күзүн эртип турар болгаш, чыл төнчүзүнде түңнелдерни үндүрүп турда, ол көргүзүглер каш катап немежи бээрин Тываның экономика сайыды Елена Каратаева дыңнаткан. 
 Бо ярмарка үезинде садыг-саарылганың, керээлерни чарган санын база түңүн, сүмелээн продукциязының шынарынга даянып, киржикчилер ортузунга конкурсту эрттирген. Комиссия кежигүннери шыңгыы шилилгени кылып, делгелгениң алдын медалының эдилекчилерин илереткен. 
 Тываның Кызыл кожуунунда эът болгаш колбаса кылыглары, сүт продукциязы саарып турар «Заря» компания «Эки эгелээшкин» деп номинацияга тиилээн. Кызыл хоорайда эм оъттар база биологтуг немелделер үндүрүп турар «Вавиол» КХН кадыкшыл быжыглаар эки шынарлыг продукциязы дээш шаңнаткан. Кызылдан «Мио-Фуд» пиццерия фирмазы «Шынарның демдээ» шаңналга төлептиг болган. Абакандан ыяштан бажың тударынга мергежээн «Крез» компания «Адырның лидери» атты чаалап алган. 
 Делгелгениң киржикчилери база аалчылар ТР-ниң Экономика яамызы биле Тываның эмчи-социал айтырыглар болгаш эргелеп-башкарылганың ЭШИ эрттиргени кадык чемненилге дугайында эртем-практиктиг конференцияны сонуургааннар. Конференцияның ажылынга 200 ажыг специалистер – эмчилер, диетологтар, эндокринологтар, Новокузнецкиниң эмчилер билиин бедидер институттуң гигиена база амыдыралдың кадык овур-хевири кафедраның төлээлери, Моолдан эртемденнер киришкен.
  «Кадык чемненилге – чоннуң кадыы» федералдыг программаны боттандырарынга арга-дуржулганы солчуп, хымыс-биле чамдык аарыгларны эмнээри, тыва болгаш өске-даа көшкүн чоннарның чаңчылчаан аъш-чеминиң биологтуг тургузуу дээш, өске-даа темаларны аңаа сайгарган. Делгелге үезинде Тываның сайгарлыкчыларының шуулганы база эрткен. Аңаа бизнес эштежилгелерниң социал, политиктиг болгаш корпоративтиг сонуургалдарын төлээлээр хөй-ниити организациязын тургузар шиитпирни хүлээп алган.
 Тыва Республиканың Дээди Хуралы, Хереглекчилерниң эргелерин база кижиниң чаагай чоруун камгалаар адырда хайгаарал талазы-биле федералдыг албанның эргелели, ТР-ниң Садыг-үлетпүр палатазы, ТР-ниң Экономика яамызы республиканың тергиин дээн сайгарлыкчыларын хүндүлел бижиктер-биле шаңнаан.

Возврат к списку