Тываның шупту кожууннарында мал оолдаашкыны доозулган

 4 кожуун: Сүт-Хөл - 82 муң баш анай, хураганны, Өвүр – барык 71 муң башты, Бай-Тайга – 56 муңну, Чөөн-Хемчик 51 муң баш мал төлүн алгаш, мурнакчыларның санынче кирген. 

 2016 чылдың мал оолдаашкынының үезинде 42 муң баш чаш бызааны алган. Чөөн-Хемчик, Кызыл база Бай-Тайга кожууннар ол талазы-биле көргүзүглери эки. Кызыл, Чөөн-Хемчик база Эрзин кожууннарның чылгычылары 14 муң баш кулуннарлыг болган. 

 2708 баш сарлык бызаазы – Мөңгүн-Тайга, Бай-Тайга база Өвүр кожууннарның 2016 чылда олчазы ол. Барыын-Хемчик биле Кызыл кожууннарда 70 баш сарлык оолдаан. Бо чылын Кызыл биле Эрзин кожууннар 10-10 баш бодаганны алган. А Улуг-Хем кожуун 2 баш бодаганныг болган. Мал оолдаашкынының үезинде 25 баш иви бызаазын алгаш, Кызыл кожуун онзаланган. Республикада нииизи-биле 1129 баш иви бар. 

 Амгы үеде, өнчүден хамаарылга чокка, республиканың шупту көдээ ажыл-агыйларында онза айыылдыг база кеш аарыгларынга удур профилактика хемчеглерин кылып турар. Ийи-чаңгыс кеш аарыглары таваржырга, мал эмчилери чогуур хемчеглерни ап турар. 

 Республикага мал оолдаашкының үезинде 3400 хире сакманчылар дузазын каткан. Ынаар тускай керээ-биле ажыл чок хамаатыларны база хаара туткан.