23.05.2016
Тывага «Чаңгыс демниг Россия» партияның баш бурунгаар бадылаашкыны 37 саналга участоктарынга эртип, таптыг-ла 20 шак турда доозулган. Шупту соңгукчуларның 13 хуузу соңгаан. Баш бурунгаар бадылаашкынның кол чорудуу – чижилгелиг, ажык эрткенин регионнуң оргкомитеди демдеглээн. Республикага 27 муң бюллетеньнер келген, бадылаашкынга 24247 соңгукчу киришкен.
Республикага көөрде, Тываның найысылалында көргүзүг арай эвээш – 9.97 хуу. Хоорайда 18 хар четкен 67 муң чурттакчы бар. Кызылда ажыттынган 10 саналга участогунга 9350 бюллетень келген. Баш бурунгаар бадылаашкынга 6741 кижи киришкен.
Праймеризке киржир бүрүткелди Тывадан 7 кижи эрткен:
1. Анай-оол Вера Ховалыговна, 1961 чылда төрүттүнген, Тыва Республиканың Ылап-ла медицина камгаладылгазының территориалдыг фондузунуң директору;
2. Глухов Виктор Григорьевич, 1949 чылда төрүттүнген, Тыва Республиканың Дээди Хуралында «Чаңгыс демниг Россия» РПП фракцияның удуртукчузу, Конститусчу-эрге-хоойлу политиказы база күрүне тургузуунуң талазы-биле комитеттиң даргазы;
3. Кан-оол Владислав Владимирович, 1977 чылда төрүттүнген, «Ру Мьюзик» КХН-ниң чиңгине директору;
4. Мазуревский Константин Сергеевич, 1981 чылда төрүттүнген, «Чаңгыс демниг Россия» партияның Төп күүсекчи комитединиң Организастыг эргелеп-башкарылга аппарадының удуртукчузу – ТКК-ниң удуртукчузунуң бирги оралакчызы;
5. Ондар Марат-оол Идамович, 1945 чылда төрүттүнген, Россияның ИХЯ-зының ТР-де хоочуннарының регион хөй-ниити организациязының даргазы;
6. Оюн Станислав Александрович, 1989 чылда төрүттүнген, "Т2 – Мобайл» КХН-ниң монобренд каналда садыглаашкын менеджери;
7. Шойгу Лариса Кужугетовна, Россия Федерациязының Федералдыг чыыжының Күрүне Думазының депутады.
Бадылаашкын рейтингилиг болгаш каш-даа кандидатка үннү бээр. Бүгү чуртта мындыг масштабтыг баш бурунгаар бадылаашкын бир дугаар эртип турар болгаш, ооң чорудуун хоойлу-биле эвес, а чурум болгаш регламент-биле таарыштырып турар. Баш бурунгаар түңнелдер бо чоокку шактарда билдинер.
Эртен баш бурунгаар бадылаашкынның регион комитединиң кежигүннери тус черниң МИЧ-теринге парлалга-конференциязын эрттирер.
Регионнуң саналга комиссиязы участоктардан протоколдарның оригиналдарын алгаш, майның 24-25-те төнчү түңнелдерни үндүрер. Ынчан регионнуң саналга комиссиязының түңнел хуралы болур.
Соңгукчуларның эң-не хөй үнүн алган киржикчилерни сентябрьның соңгулдаларынче партиядан кандидат кылдыр идип үндүрер.
«Чаңгыс демниг Россияның» ТРС.