Тыва Республикада инженер-технологтуг («шахтер») класстарның I следу Кызылга болуп эртер

 2016 чылдың май 21-де, Кызылдың 15 дугаар школазының баазазынга, Тыва Республикада инженер-технологтуг («шахтер») класстарның I следу болуп эртер. 

 Амгы үеде республиканың беш школазында «шахтер» класстарда 8-ки классчы 100 кижи өөренип турар. Олар дээрге Кызылдың № 15, Таңдының Бай-Хаак, Чеди-Хөлдүң Хову-Аксы, Кызыл кожууннуң Каа-Хемниң № 1 база Элегес-Аксы школаларының өөреникчилери-дир. 

 Ол класстарда инженер-технологтуг угланыышкынны нептередири-биле өөредилге планында элективтиг курстарда графика, физика, геология, химия эртемнерин киирген. Өөредилгеден дашкаар ажыл-чорудулгада «ГТО», «Даштың кайгамчык делегейи», «Экология талазы-биле төлевилел ажыл-чорудулгазы», «Билдингир-даа бол, шынзыгар аргажок», «Физикада төлевилел ажыл-чорудулгазы», «Профориентация», «Химияда төлевилел ажыл-чорудулгазы», «Экскурсия» курстарын берип турар.

 Өөреникчилерге өөредилге чылының дургузунда даг-тывыш үлетпүрүнүң бүдүрүлгелеринче экскурсияларны база организастаан. 

  «Шахтер» класстарның следунда, өөредилге чылының түңнелдерин үндүрери-биле, төлевилелдерни камгалаар. Аңаа эксперттер кылдыр Тываның инженерлер ассоциациязының, «Майнинг» чылыдылга-энергетика үлетпүр компаниязының, Тываның даг-руда компаниязының, "Межегейуголь" хөмүр-даш компаниязының, "Кызылдың ЧЭТ" база "Тываэнерго" КХН-нерниң төлээлерин чалаан. 

 Тыва Республиканың Чазаанда Экономика чөвүлелиниң хуралының шиитпири-биле, улуг компанияларга профессионал кадрларны школадан эгелеп белеткээр дээш «шахтер» класстарны ажыткан. 

 Чөвүлелдиң хуралында Тываның Баштыңы Шолбан Кара-оол сөс алгаш, бедик мергежилдиг кадрларны база амгы үениң менеджерлерин белеткеп шыдаар профөөредилге системазын тургузары чугула деп айыткан. «Республикада инвесторлар болгаш бүдүрүлгелерниң хереглелин чүгле анаа-ла санаан эвес, а оларже чиге угланган профессионал өөредилге системазын тургузар херек» - деп, ол чугаалаан.