Майның 23-29 хүннеринде Тывага Сайгарлыкчы чорук неделязы эртер

 Майның 23-29 хүннеринде Тывага Сайгарлыкчы чорук неделязын эрттирер талазы-биле хемчеглер планын республиканың чазаа бадылаан. 

 Бүгү-российжи сайгарлыкчы чорук неделязында хыналда-хайгаарал органнары, сайгарлыкчы чорукту деткиир инфраструктура оргаизациялары, чээли организациялары ажык консультацияларны организастаар. «Субедей» спорткомплекизинге «Тыва-Экспо» делгелге-ярмарка үезинде сайгарлыкчыларга он ажыг организациялар тайылбырларны бээр.

 Российжи сайгарлыкчы чорук хүнүнге тураскааткан дыштаныр хүннүң ярмарказы майның 28-29 хүннеринде «Сайзырал» база Иркутская кудумчузунда көдээ ажыл-агый рыноктарынга садып алыкчыларга бараан болур. 

  Моолдуң девискээринде Боршоо деп черге кызыгаар чоогунуң садыг ярмарказы майның 25-27 хүннеринде тус черниң бараан бүдүрүкчүлериниң киржилгези-биле эртер.

  Май 26-да Кызылда Хөй талалыг ажыл-чорудулгалыг төпте (МФЦ) сайгарлыкчы чорук субъектилеринге консультация пунктузун албан езузу-биле ажыдар. 

  Республиканың билдингир сайгалыкчылары биле экономика база менеджмен адырының студентилери-биле ужуражылгаларны ол неделяда Тыва Республиканың Экономика яамызы биле дээди болгаш ортумак өөредилге албан черлери организастаар. Бүдүрүлге адырында биче болгаш ортумак бизнестиң бүдүрүлгелеринге, Тыва Республиканың Сайгарлыкчы чорукту деткиир фондуга, Бизнес-Инкубаторунга таныштырылгалыг экскурсияларны студентилерге эрттирер. Москва биле Новосибирск хоорайлардан бизнес-тренерлер Андрей Крылов база Ирина Отвагина мастер-класстарны база өөредиглиг курстарны бээр.

  Тыва Арат Республиканың тургустунганындан бээр 95 чыл оюнга тураскааткан «Тываның экономиказы: төөгүлүг анализ, кол тенденциялар база сайзыралдың перспективалары» база «Тыва Республиканың чурттакчы чонунуң кадык чемненилгезиниң чугула айтырыглары» темаларга эртем-практиктиг конференциялар база болур.

 Сайгарлыкчылар неделязының ол бүгү хемчеглери сайгарлыкчыларның шуулганы-биле доостур. Аңаа Тыва Республиканың тергиин дээн сайгарлыкчыларын шаңнап мактаар.